په کابل کې د سره میاشت ښارګوټي له غیرمجازو ودانیزو چارو څخه څارنه وشوه
۱۴۴۸/۴/۳
د کور او ښار جوړولو وزارت د ښاري سرغړونو د مخنیوي عمومي ریاست اړوند د ښاري تخلفاتو د مخنیوي ریاست تخنیکي ټیم د کابل ښار په پنځمه ناحیه کې د سره میاشت ښارګوټي له ودانیزو چارو څخه ساحوي څارنه ترسره کړه.
د څارنې تخنیکي ټیمونو تر دې وړاندې هم څو ځله له یادې ساحې څخه لیدنه کړې او د پروژو مالکانو ته یې سپارښتنه کړې وه چې له ښاري اصولو او مقرراتو سره مخالفې ودانیزې چارې ودروي، څو په دې اړه د وزارت د مقام له لوري وروستۍ پرېکړه وشي.
د بیا ځلي څارنې پر مهال څرګنده شوه چې یو شمېر سرغړوونکو د هغې ساحې په محدوده کې، چې د سیلاب لپاره ځانګړې شوې او د شنې ساحې حریم هم پکې په پام کې نیول شوی، یو ځل بیا د استوګنیزو کورونو په جوړولو لاس پورې کړی دی.
تخنیکي ټیم په ساحه کې یادې ودانیزې چارې ودرولې، اړوندو کسانو ته یې لازمې سپارښتنې وکړې او د پروژو اړوند لازم اسناد یې ترې وغوښتل.
د دغې څارنې موخه د ښاري پلانونو خلاف فعالیتونو مخنیوی، د غیرمجازو ودانیزو چارو د پراختیا مخنیوی او په کابل ښار کې د ښاري اصولو او مقرراتو د پلي کېدو ډاډ ترلاسه کول دي.
