د فاریاب ولایت د خواجه موسی ولسوالۍ د تفصیلي پلان سروې او توپوګرافي پیل شوه
۱۴۴۸/۲/۱۲
د فاریاب ولایت د کور او ښار جوړولو ریاست تخنیکي ټیم د خواجه موسی ولسوالۍ د تفصیلي پلان د سروې او توپوګرافۍ د ترسره کولو په موخه یادې ولسوالۍ ته سفر وکړ.
د سروې د عملي چارو له پیل وړاندې، تخنیکي ټیم د ولسوالۍ له ولسوال، ښاروال، قومي مشرانو او سپین ږیرو سره ګډه غونډه ترسره کړه. په غونډه کې د تفصیلي پلان د ارزښت، د سروې د موخو او د سیمه ییزو همکاریو په اړه خبرې وشوې او د سیمې مسؤلینو د بشپړې همکارۍ ډاډ ورکړ.
وروسته له غونډې، تخنیکي ټیم د خواجه موسی ولسوالۍ د تفصیلي پلان د توپوګرافي سروې او تخنیکي معلوماتو د راټولولو عملي چارې پیل کړې.
د یادونې وړ ده، چې د کور او ښار جوړولو وزارت د هېواد په بېلابېلو ولایتونو کې د ښارونو او ولسوالیو د منظمې پراختیا، د ځمکو د اغېزمنې استفادې او د زیربنايي پروژو د معیاري پلي کېدو په موخه د تفصیلي پلانونو د چمتو کولو او سروې چارې په دوامداره توګه پر مخ وړي.
