د کابل ښار په څلورمه ناحیه کې د ښاري سرغړونو د مخنیوي او قانوني اسنادو د ارزونې څارنه ترسره شوه
۱۴۴۸/۲/۳
د کور او ښار جوړولو وزارت د کیفیت کنټرول او ښاري سرغړونو ته د رسېدنې لوی ریاست اړوند د ښاري سرغړونو د مخنیوي ریاست د رسېدنې او عامه پوهاوي آمریتونو تخنیکي ټیمونو، د خپلو دوامدارو څارنو په لړ کې، د کابل ښار د څلورمې ناحیې د دویم پروان سیمې (۱۸، ۱۹، ۲۰، ۲۱ او ۲۲ کوڅو) څخه څارنه ترسره کړه.
د دغې څارنې پر مهال هغه ساختماني پروژې وکتل شوې چې د نافذه قوانینو، منظور شوو ښاري پلانونو او د ګاونډیانو د حقوقو او محرمیت د نقض، په ځانګړي ډول د غیرقانوني کړکیو د جوړولو، د احتمالي سرغړونو نښې یې لرلې.
همدارنګه، له هغو ودانیزو پروژو مالکینو څخه چې قانوني اسناد، ودانیز جوازونه او نور رسمي مدارک یې نه وو وړاندې کړي، وغوښتل شول چې خپل اسناد د ښاري سرغړونو ړ مخنیوي ریاست ته وسپاري، ترڅو د منظور شوو پلانونو سره د مطابقت تر ارزونې وروسته، د هر ډول سرغړونې د تثبیت په صورت کې، د نافذه قوانینو له مخې لازم قانوني اقدامات ترسره شي.
د دغو څارنو موخه د منظور شوو ښاري پلانونو پلي کېدل، د غیرمعیاري او بې حده ساختماني تراکم مخنیوی، د ښاري نظم تأمین، د ګاونډیانو د حقوقو او محرمیت ساتنه، د ودانیزو چارو د کیفیت لوړول او د ښاري مدیریت پیاوړتیا ده.
د کور او ښار جوړولو وزارت د کیفیت کنټرول او ښاري سرغړونو ته د رسېدنې لوی ریاست ټینګار کوي چې د کاري پلان له مخې به د کابل ښار په ټولو ناحیو کې دا ډول څارنې په دوامداره توګه ترسره کېږي او د هر ډول ښاري سرغړونې پر وړاندې به د نافذه قوانینو له مخې لازم قانوني اقدامات وشي.
