د سرې میاشت ښارګوټي څخه د ښاري سرغړونو د مخنیوي په موخه څارنه ترسره شوه
۱۴۴۸/۱/۲۲
د کور او ښار جوړولو وزارت د کیفیت کنټرول او د ښاري سرغړونو مخینوي عمومي ریاست اړوند، د ښاري سرغړونو د مخنیوي ریاست تخنیکي ټیم د کابل ښار د پنځمې ناحیې د سرې میاشت ښارګوټي له بېلابېلو برخو څخه د ښاري سرغړونو د مخنیوي په موخه ساحوي څارنه ترسره کړه.
یاده څارنه د هغو ودانیزو فعالیتونو د ارزونې په موخه ترسره شوه، چې تر دې وړاندې یې مالکینو ته د ښاري اصولو او نافذه مقرراتو خلاف د چارو د درولو سپارښتنه شوې وه.
د ترلاسه شویو معلوماتو له مخې، یو شمېر سرغړوونکو بیا ځلې خپلې ودانیزې چارې پیل کړې وې، چې له همدې امله تخنیکي ټیمونه سیمې ته واستول شول.
د ساحوي ارزونې پر مهال څرګنده شوه، چې په ځینو ځایونو کې له تصویب شویو ښاري پلانونو سره په ټکر کې ودانیز فعالیتونه روان دي. له همدې امله یادې چارې ودرول شوې او له سرغړوونکو سره د نافذه اصولو او مقرراتو له مخې لازم قانوني اقدامات ترسره شول.
د دغو څارنو موخه د تصویب شویو ښاري پلانونو د تطبیق ډاډمنول، د غیرقانوني ودانیزو فعالیتونو مخنیوی او په کابل ښار کې د ښاري نظم او قانون حاکمیت پیاوړتیا ده.
د ښاري سرغړونو د مخنیوي، د تصویب شویو ښاري پلانونو د خوندي تطبیق او د ښاري نظم د ټینګښت په موخه به د کابل ښار په بېلابېلو سیمو کې د تخنیکي څارنو لړۍ دوام ولري او د نافذه قوانینو له مخې به له هر ډول سرغړونو سره قانوني چلند ترسره کېږي.
