د کابل ولایت د اداري کمپلکس د جوړولو پر څرنګوالي خبرې وشوې
۱۴۴۸/۱/۱۳
د کور او ښار جوړولو وزارت د ښاري چارو مرستیال شیخ مدارعلي کریمي بامیاني په مشرۍ، د یاد وزارت د اړوندو مسؤلینو او انجنیرانو په ګډون غونډه ترسره شوه.
په دې غونډه کې د کابل نوي ښار د دهسبز ولسوالۍ په ساحه کې د کابل ولایت د اداري کمپلکس د جوړولو پر څرنګوالي بحث او د نظرونو تبادله وشوه.
یاده غونډه د چارو ادارې د غوښتنې پر بنسټ جوړه شوې وه، چې له مخې یې له کور او ښار جوړولو وزارت څخه غوښتل شوي وو څو د کابل ولایت د اداري کمپلکس د جوړولو اټکلي لګښت وارزوي، په غونډه کې اړوند تخنیکي معلومات وړاندې شول او ګډونوالو د پروژې د عملي کېدو په اړه خپل نظریات شریک کړل.
د کور او ښار جوړولو وزارت د ښاري چارو محترم مرستیال اړوندو مسؤلینو او انجنیرانو ته لارښوونه وکړه چې د پروژې اړوند تخنیکي او اجرایي چارې په چټکۍ سره ترسره او له چارو ادارې سره لازمې همغږۍ رامنځته کړي.
د غونډې په پای کې د چارو د لا ښه همغږۍ او چټکتیا په موخه مسؤل اشخاص وټاکل شول، ترڅو د چارو ادارې سره په همغږۍ د پروژې اړوند چارې پرمخ یوسي.
