د بدخشان ولایت د بهارک ولسوالۍ د تجارتي مارکېټ د جوړولو له پروژې څخه نظارت ترسره شو
۱۴۴۸/۱/۸
د بدخشان ولایت د کور او ښار جوړولو ریاست تخنیکي ټیم له لوري د بهارک ولسوالۍ د تجارتي مارکېټ د جوړولو له روانو چارو څخه نظارت ترسره شو.
د یادې پروژې ودانیزې چارې تر دې مهاله ۷۵ سلنه فزیکي پرمختګ کړی دی.
د ساحوي نظارت پر مهال څرګنده شوه چې د ودانۍ د داخلي پلستر کولو چارې بشپړې شوې او همدارنګه د ودانۍ د فلزي دروازو د نصب چارې هم روانې وې.
د تخنیکي ټیم د ارزونې له مخې، د پلستر کارۍ په جریان کې یو شمېر نیمګړتیاوې موجودې وې، چې پکې د ناسم ډول شګو کارول او د نورم مطابق د پلستر شوې برخو د لندولو نشتوالی شامل و.
د نظارت په پایله کې اړوندو مسؤلینو ته لازمې تخنیکي سپارښتنې وشوې، ترڅو د کار په ټولو مرحلو کې له معیاري ساختماني موادو کار واخیستل شي او د پلستر کولو د پروسې اصول په دقیق ډول رعایت شي.
ټاکل شوې ده چې د یادو سپارښتنو په عملي کولو سره د پروژې پاتې چارې د معیارونو مطابق بشپړې شي.
