له ۴۸ زره څخه زیاتو راستنېدونکو کورنیو ته د استوګنې ځمکې ووېشل شوې
۱۴۴۸/۱/۴
د کور او ښار جوړولو وزارت په مشرۍ د دایمي مېشتېدنې او د ځمکو د وېش کمېټې، د تیرې پنجشنبې په ورځ د هېواد په اوو ولایتونو کې ۵۵۴ راستنېدونکو مهاجرو کورنیو ته استوګنیزې نمرې ووېشلې.
د راستنېدونکو هېوادوالو د دایمي مېشتېدنې او د مناسبې سرپناه د برابرولو په موخه، دا ځل په ننګرهار، فراه، هلمند، نیمروز، فاریاب، بلخ او زابل ولایتونو کې سلګونه کورنۍ د استوګنیزو ځمکو له نمرو برخمنې شوې.
په ننګرهار ولایت کې ۱۶۶، فراه ولایت کې ۱۲۵، زابل ولایت کې ۹۸، فاریاب ولایت کې ۶۲، بلخ ولایت کې ۶۰، نیمروز ولایت کې ۲۷ او هلمند ولایت کې ۱۶ راستنېدونکو مهاجرو کورنیو ته د استوګنیزو ځمکو نمرې ووېشل شوې.
د یادونې وړ ده چې یوازې د تیرې پنجشنبې ورځې په جریان کې ۵۵۴ کورنۍ د استوګنیزو ځمکو له نمرو برخمنې شوې، چې ورسره په ټول هېواد کې د وېشل شویو استوګنیزو نمرو شمېر ۴۸ زره او ۵۴۵ کورنیو ته رسېدلی دی.
د راستنېدونکو مهاجرو د دایمي مېشتېدنې، د سرپناه د برابرولو او د ژوند د بنسټیزو اسانتیاوو د رامنځته کولو په موخه د استوګنیزو ځمکو د وېش بهیر په منظم او چټک ډول دوام لري.
