د تورغونډۍ بندر د احاطوي دېوال د ودانیزو چارو تخنیکي څارنه ترسره شوه
۱۴۴۷/۱۲/۰۶
د کور او ښار جوړولو وزارت اړوند تخنیکي پلاوي، د هرات ولایت رباط سنګي ولسوالۍ کې د تورغونډۍ بندر د احاطوي دېوال د ودانیزو چارو له روان بهیر څخه ساحوي او تخنیکي څارنه ترسره کړه.
یاد ګډ پلاوی چې د ولایت مقام استازي، د رباط سنګي ولسوالۍ د مرستیال، د کور او ښار جوړولو ریاست استازو څخه جوړ شوی، د پروژې د تطبیق بهیر یې له نږدې وارزاوه.
د څارنې پر مهال څرګنده شوه، چې اوسمهال د پروژې په ساحه کې د احاطوي دېوال د سنګ کارۍ او کیورینګ چارې روانې دي او کارونه د تخنیکي مشخصاتو او منظور شوو معیارونو مطابق مخته وړل کېږي.
همداراز، د تخنیکي پلاوي له لوري قراردادي شرکت ته لازمې سپارښتنې او تخنیکي لارښوونې وشوې، څو د پروژې چارې د ټاکل شوو معیارونو، تخنیکي اصولو او منظور شوي پلان مطابق په معیاري ډول بشپړې شي.
د دغې څارنې موخه د پروژې د کیفیت ارزونه، د ودانیزو معیارونو رعایت، د چارو د شفاف تطبیق ډاډمنول او د بندري تاسیساتو د بنسټیزو پروژو د معیاري تطبیق تأمین یاد شوی دی.
