د لوګر ولایت د کډوالو ښارګوټي کې د څښاک اوبو د څاهګانو د کېندنې له چارو څخه تخنیکي څارنه ترسره شوه
۱۴۴۸/۲/۱۸
د لوګر ولایت د کور او ښار جوړولو ریاست د انجینري او نظارت ټیم د کډوالو او بېرته راستنېدونکو لپاره په وېشل شوي ښارګوټي کې د څښاک اوبو د څاه ګانو د کېندنې له روانو چارو څخه تخنیکي څارنه ترسره کړه.
د لومړۍ څاه د کېندنې چارې بشپړې شوې دي او دا مهال یې د ساتندویه سیوري د جوړولو کار روان دی. د دویمې څاه د کېندنې چارې هم بشپړې شوې او د اوبو لېږد پایپونه پکې نصب شوي دي. همدارنګه، د درېیمې څاه د کېندنې چارې لا هم په منظم ډول دوام لري.
د یادې پروژې شاوخوا ۶۰ سلنه رغنیزې چارې بشپړې شوې دي.
د څارنې پر مهال قراردادي شرکت ته سپارښتنه وشوه چې د پروژې ټولې چارې د منظور شوو تخنیکي نقشو، د قرارداد شرایطو او نافذه انجینري معیارونو سره سم ترسره کړي، ترڅو پروژه په ټاکلي وخت او مطلوب کیفیت بشپړه او د ګټې اخیستنې لپاره چمتو شي.
