د کابل ښار د شهرنو پارک اړوند سیمو کې د ساختماني پروژو تخنیکي څارنه ترسره شوه
۱۴۴۷/۱۱/۲۷
د کور او ښار جوړولو وزارت، د ښاري سرغړونو او د پروژو پر تطبیق د څار محترم عمومي ریاست اړوند د ښاري سرغړونو د مخنیوي ریاست تخنیکي ټیمونو، د دوامدارو نظارتي پروګرامونو په لړ کې د کابل ښار د لسمې ناحیې اړوند د شهرنو پارک په بېلابېلو برخو کې د روانو ساختماني پروژو څخه ساحوي تخنیکي څارنه ترسره کړه.
یاده څارنه د اړوندو امریتونو د تخنیکي ټیمونو له لوري ترسره شوې، چې په ترڅ کې یې د ساختماني پروژو وضعیت، د منظور شوو ښاري پلانونو تطبیق او د نافذه قوانینو رعایت له نږدې وارزول شو.
د ارزونې پر مهال هغه پروژې وڅېړل شوې چې پکې د ښاري پلانونو د احتمالي سرغړونې، د ګاونډیانو د حریم د نقض او یا هم د غیرقانوني کړکیو د جوړېدو نښې موجودې وې.
په همدې تړاو، د پروژو له مالکینو وغوښتل شول چې خپل رسمي اسناد، جوازونه او تخنیکي مدارک اړوند ریاست ته وسپاري، څو د دقیقې ارزونې او د منظور شوو پلانونو سره د مطابقت له تثبیت وروسته، د هر ډول سرغړونې په صورت کې لازم قانوني اقدامات ترسره شي.
د معلوماتو له مخې، په ساحه کې ساختماني چارې په عادي ډول روانې دي او تخنیکي ټیمونه د قانوني او تخنیکي معیارونو د رعایت په موخه دوامداره څارنه ترسره کوي.
د دغو څارنو اساسي موخه د ښاري پلانونو سم تطبیق، د غیرمعیاري تراکم مخنیوی، د ښاري بې نظمۍ راکمولو، د ګاونډیانو د حقوقو او شخصي حریم ساتنه، د ساختماني کیفیت لوړول او د ښاري مدیریت پیاوړتیا بلل کېږي.
