د بامیان ښار د فولادي سړک لوېدیځ مسیر کې د غیرقانوني ودانیزو فعالیتونو څارنه ترسره شوه
۱۴۴۷/۱۰/۲۰
د بامیان ولایت د کور او ښار جوړولو ریاست اړوند ښاري سرغړونو ته د رسېدنې تخنیکي ټیم له لوري، د فولادي سړک د لوېدیځ مسیر او د غلغله هوټل مخې ته ساحوي څارنه ترسره شوه.
دغه څارنه د کور او ښار جوړولو وزارت اړوند د ښاري سرغړونو د مخنیوي او د پروژو پر تطبیق د څار محترم عمومي ریاست د هدایت پر بنسټ ترسره شوه.
دغه څارنه د ښاري ماستر پلان د تطبیق د ارزونې په موخه ترسره شوې، چې په ترڅ کې یې څرګنده شوه، یاده ساحه د ښاري پلان له مخې زراعتي کارونې ته ځانګړې شوې ده. له همدې امله، یوازې د کرنیزو او ځنګلي فعالیتونو دوام او ښه والی پکې مجاز بلل شوی، په دې شرط چې د ونو شمېر او د شنو ساحو اندازه کمه نه شي او د اوبو لګولو په سیستم کې اساسي بدلون رامنځته نه شي.
همدارنګه، د یاد پلان له مخې ودانیز فعالیتونه یوازې د کرنې او ځنګلداري د خدمت لپاره د ټاکلو معیارونو په رعایت سره اجازه لري، چې پکې د ودانۍ تراکم، محدود ساختماني ساحه او اعظمي یو پوړ ارتفاع شامل دي.
خو د څارنې پر مهال څرګنده شوه، چې په یاده ساحه کې په دوو بېلابېلو نقطو کې یو شمېر کسانو له یادو اصولو پرته په خپل سر ودانیز فعالیتونه پیل کړي، چې دا چاره د ښاري نظم او منظم پرمختګ پر وړاندې جدي ستونزې رامنځته کوي.
له همدې امله، ټینګار وشو چې له هر ډول غیرقانوني ودانیزو فعالیتونو څخه مخنیوی وشي او هېڅوک دې پرته له قانوني جواز څخه ساختماني چارې نه ترسره کوي.
د ښاري ماستر پلان تطبیق او د غیرقانوني ودانیزو فعالیتونو مخنیوی د منظم ښاري پرمختګ، د چاپېریال ساتنې او د قانون د حاکمیت لپاره بنسټیز اهمیت لري.
