د کابل ښار په اوولسمه ناحیه کې د ۱۲ پوړیزې استوګنیزې پروژې څارنه وشوه
۱۴۴۷/۱۰/۱۷
د کور او ښار جوړولو وزارت، له ښاري سرغړونو دمخنیوي محترم ریاست تخنیکي او مسلکي ټیم د کابل ښار په اوولسمه ناحیه کې د ۱۲ پوړیزې استوګنیزې ودانۍ څخه څارنه وکړه.
دغه تخنیکي څارنه د ښاري تخلفاتو د مخنیوي او د پروژو پر تطبیق د څار محترم عمومي ریاست په همغږۍ ترسره شوه.
د څارنې په مهال څرګنده شوه، چې د مرکزي تودوخې سیسټم نصبول، د دهلیزونو د مرمر ډبرو کار، د برېښنا او لفټ تجهیزاتو نصبول او د اوبو رسولو او کانالېزاسیون شبکو اړوند کارونه په جریان کې دي.
یاده پروژه د وزارت د املاکو او اسکان ریاست تر مدیریت لاندې، د خلکو په مالي ملاتړ تمویلېږي او تر دې دمه یې شاوخوا ۸۵.۵ سلنه فزیکي پرمختګ کړی دی.
د تخنیکي ټیم له لوري د تطبیق کوونکي شرکت ته لازمې لارښوونې وشوې، څو د ملي او نړیوالو معیارونو او د کار د خوندیتوب اصولو په رعایت سره چارې په معیاري ډول پر مخ یوسي.
