د هلمند ولایت د اطلاعاتو او کلتور ریاست د جامع مسجد د ودانیزو چارو تخنیکي څارنه ترسره شوه
۱۴۴۷/۰۹/۲۶
د هلمند ولایت د کور او ښار جوړولو ریاست تخنیکي ټیم د اطلاعاتو او کلتور ریاست په انګړ کې د جوړېدونکي جامع مسجد له روانو ودانیزو چارو څخه تخنیکي څارنه ترسره کړه.
د ساحوي څارنې پر مهال څرګنده شوه چې په یاده پروژه کې د مسجد د چت د کانکریټو د ساتنې په موخه د اوبو ورکولو چارې روانې دي او همدارنګه د قالبونو د لېرې کولو بهیر هم دوام لري.
د کور او ښار جوړولو ریاست تخنیکي ټیم د قراردادي شرکت له مسؤل انجنیر سره په خبرو کې ټینګار وکړ چې د کانکریټو د معیاري ساتنې لپاره دې د اوبو ورکولو چارې په منظم ډول دوام ومومي او د قالبونو د لېرې کولو پر مهال دې د ساحوي کارکوونکو د خوندیتوب اصولو ته جدي پاملرنه وشي.
همدارنګه د شرکت ساحوي انجنیر ته سپارښتنه وشوه چې د کارکوونکو د خوندیتوب تدابیر په بشپړ ډول مراعت کړي او ټولې ودانیزې چارې د تخنیکي نقشو، ټاکل شوو مشخصاتو او د کارونو د احجامو له مخې په معیاري او تخنیکي ډول پر مخ یوسي.
د هلمند ولایت د اطلاعاتو او کلتور ریاست جامع مسجد د امارتي ادارو له مهمو دیني تاسیساتو څخه ګڼل کېږي چې په بشپړېدو سره به د ادارې کارکوونکو او مراجعینو لپاره د عبادت مناسب، منظم او معیاري چاپېریال برابر کړي.
