د کابل ښار په اوولسمه ناحیه کې د ناقانونه رغنیزو او سوداګریزو فعالیتونو پر ضد جدي اقدام
۱۴۴۷/۹/۶
د کور او ښار جوړولو وزارت، له ښاري سرغړونو د مخنیوي او د پراختیایي پروژو پر تطبیق د څار محترم عمومي ریاست په همغږۍ، د دغه وزارت د ښاري تخلفاتو د مخنیوي محترم ریاست تخنیکي ټیمونو، د کابل ښار اوولسمې ناحیې اړوند سیمو کې د ښاري سرغړونو د مخنیوي په موخه عملي اقدامات ترسره کړل.
دغه څارنه د کوتل سړک له پیل څخه تر پایه پورې، چې ادروګل ښارګوټی او طلایي ښارګوټی هم په کې شامل دي، ترسره شوه.
د کوتل سړک چپ لوري ته هټیوالو ارانو ته د تېر په څېر د ۱۵ ورځو مهلت ورکړل شو، څو خپل ناقانونه جوړښتونه اصلاح یا تخلیه کړي.
د اقدام د ښاري قوانینو او مقرراتو د پلي کېدو، د غیر منظمې ګڼې ګوڼې د مخنیوي، د منظور شوو پلانونو مطابق د پروژو د تطبیق او په ښار کې د ناقانونه رغنیزو فعالیتونو د پراختیا د مخنیوي په موخه ترسره شو.
یاده څارنه ترسره شوه، څو ډاډ ترلاسه شي چې د ښار جوړولو قوانین په بشپړ ډول رعایت کېږي، پروژې د تصویب شوو نقشو له مخې عملي کېږي او د ساختماني سرغړونو مخه په جدي ډول نیول کېږي.
د کور او ښار جوړولو وزارت، ټینګار کوي چې د قانون پلي کېدل د منظم، خوندي او معیاري ښار د رامنځته کېدو بنسټ جوړوي، او دا ډول اقدامات به په دوامداره توګه ترسره کېږي.
