د نیمروز ولایت په هغه سیمو کې چې د بهسازۍ پلان ورته جوړېږي، په تړاو یې خلکو ته پوهاوی ورکړل شو
۱۴۴۷/۷/۱
د کور او ښار جوړولو وزارت محترم وزیر الحاج مولوي نجیب الله حیات حقاني، نیمروز ولایت ته یو هیئت واستو، ترڅو د ځینو اړمنو سیمو لپاره د بهسازۍ پلانونو چمتو شي.
نیمروز ولایت کې د کور او ښار جوړولو ریاست د وړاندیز او د ولایت د محترم مقام د حکم پر بنسټ، یو ګډ پلاوی د بېلا بېلو ادارو د استازو په ګډون، د نیمروز ښار په یوې غیرپلاني ساحه کې د ودانیزو چارو د مخنیوي په موخه څارنه ترسره کړه.
یاد پلاوی د کور او ښار جوړولو ریاست، ښاروالۍ ریاست، برېښنا ریاست، د ولایت مقام، د علماوو شورا، امنیه قومندانۍ او عدلیې ریاست د استازو څخه جوړ شو.
د دې اقدام موخه دا وه، څو تر هغه وخته چې د یادې سیمې ښاري پلان نهايي کېږي، په نوموړې ساحه کې د هر ډول ودانیزو فعالیتونو، تصرف او د ملکیتونو د وېش مخنیوی وشي او اړوندو اشخاصو ته د هر ډول جواز او اجازې له صادرولو څخه ډډه وشي.
د ترسره شوې څارنې پر مهال ټینګار وشو، چې په سیمه کې باید له هر ډول خپلسرو ساختماني فعالیتونو څخه مخنیوی وشي.
همدارنګه د سیمې اوسېدونکو ته په رسمي ډول خبر ورکړل شو، چې د ښاري بهسازۍ د تفصیلي پلان تر ترتیب او د هغه تر عام لاسرسي پورې، په یاده ساحه کې له هر ډول ودانیزو چارو څخه ډډه وکړي.
د کور او ښار جوړولو وزارت، دغه اقدام د ښاري نظم د ټینګښت، د غیرمنظمې پراختیا د مخنیوي او د ښاري پلانونو د سم تطبیق په موخه ترسره کوي او په دې برخه کې به څارنې په دوامداره توګه روانې وي.
