په پکتیا کې د مهاجرینو ښارګوټي له ودانیزو چارو څارنه ترسره شوه
۱۴۴۷/۶/۴
د پکتیا ولایت د کور او ښار جوړولو ریاست محترم رئیس مفتي عبیدالله رشاد وایي چې د دې ریاست تخنیکي ټیم د هغه په مشرۍ د رباط سیمې په مهاجرینو ښارګوټي کې د روانو ودانیزو چارو ارزونه او څارنه ترسره کړه.
مفتي عبیدالله رشاد وویل. د یاد ښارګوټي د پرمختیایي چارو بهیر یې له نېږدې وڅاره او د قراردادي شرکت مسؤلینو ته یې لازمې سپارښتنې وکړې، څو ټولې چارې د تصویب شوې نقشې او انجینري معیارونو پر اساس د تخنیکي ټیم تر دوامداره څارنې لاندې پر وخت او په لوړ کیفیت بشپړکړي.
نوموړي ټینګار وکړ چې دا پروژه به د راستنو شوو او بې ځایه شویو مهاجرو لپاره د مناسب او خوندي استوګنځای د برابرېدو زمینه برابره کړي. د ښارګوټي په پروژه کې تر دې دمه د ۱۰۰ کورونو خښت کاري بشپړه شوې، د ۶۰ کورونو چت اچول ترسره شوي، او د جومات او مدرسې د کالمونو کار روان دی. د تخنیکي ټیم له لوري د چارو د لا اغېزمنتیا لپاره یو لړ مسلکي نظریات هم قراردادي شرکت ته وړاندې شول..
د پکتیا مهاجرینو ښارګوټی د راستنو شوو او بې ځایه شویو کورنیو د اسکان ستونزو د حل لپاره مهمه پرمختیایي پروژه ده. دا ښارګوټی د معیاري استوګنې، خدمتونو او ټولنیز ثبات د پیاوړتیا لپاره طرحه شوی دی.
