د نیله باغ پروژې د پرمختګونو په تړاو خبرې وشوې
۱۴۴۷/۰۴/۰۶
د کور او ښار جوړولو وزارت محترم وزیر الحاج نجیب الله حیات حقاني په خپل کاري دفتر کې د نیله باغ پروژې د چینایي مسؤل ښاغلي لي لونګ سره وکتل.
په پیل کې ښاغلي لي لونګ د افغان لوري له هڅو مننه وکړه، نوموړي د نیله باغ پروژې د روانو چارو، پرمختګونو او شته وضعیت په تړاو معلومات وړاندې کړل، ښاغلي لي د اوبو د چاڼ خونې د ډیزاین د بشپړولو او تائیدلو غوښتنه وکړه، ترڅو د تطبیق لپاره چمتو شي.
محترم وزیر الحاج نجیب الله حیات حقاني له چینایي لوري مننه وکړه چې د افغانستان د بیا رغونې ترڅنګ یې د خلکو د سرپناه برابرولو په برخه کې عملي ګامونه پورته کړي دي، نوموړي زیاته کړه چې په راتلونکو پروژو کې دې اسلامي ارزښتونه، د افغانانو کلتور، دودونه او ملي ځانګړتیاوې په پام کې ونیول شي، څو جوړېدونکې ودانۍ د افغاني ارزښتونو او فرهنګ سره سمې وي.
همداراز ښاغلي وزیر اړوندو ادارو ته هدایت وکړ ترڅو د اوبو د چاڼ خونې ډیزاین بشپړ کړي او د تطبیق لپاره یې مقابل لوري ته وسپاري.
د نیله باغ پروژه د هغو مهمو پروژو له ډلې ده چې د افغانستان د کور جوړولو په برخه کې د پام وړ پرمختګ او اسانتیاوې رامنځته کوي، د دې پروژې بشپړېدل به د کورونو د نشتون ستونزو په کمولو کې د پام وړ رول ولوبوي او ګڼ شمېر کورنیو ته به د استوګنې زمینه برابره کړي.
