ارزګان ولایت کې د ښاري سرغړونو د مخنیوي په موخه څارنیز فعالیتونه ترسره شول
۱۴۴۷/۳/۲۰
د کور او ښار جوړولو وزارت، له ښاري سرغړونو د مخنیوي ریاست محترم رئیس مولوي عبدالمنان حقاني وایي، د ریاست اړوند تخنیکي ټیم یې په ارزګان ولایت کې د ښاري سرغړونو د پېژاندنې او مخنیوي په موخه څارنیز فعالیتونه پیل کړل.
ښاغلی مولوي حقاني وایي، د تخلفاتو د مخنیوي ځانګړي ټیم له خوا د ترینکوټ ښار اړوند د لومړۍ ، دوهمې، درېیمې او څلورمې ناحیې له ودانیز وضعیت څخه څارنه وشوه.
نوموړی وایي، یاده څارنه په ارزګان ولایت کې د کور او ښار جوړولو ریاست د محترم رئیس حاجي ملا روحالله (ابواحمد) په لارښوونه ترسره شوې ده.
مولوي عبدالمنان حقاني وایي، په څلورمه ناحیه کې د یوې استوګنیزې نمرې پر سر، یو تن هڅه کوله چې په غیر قانوني ډول د سوداګریزو موخو لپاره ودانۍ جوړه کړي.
مولوي حقاني زیاتوي، د ښاري سرغړونو د مخنیوي ټیم له خوا ورته لازمې مشورې او قانوني سپارښتنې وشوې، او یاد شخص ته وضاحت ورکړل شو چې یاده ساحه د استوګنې لپاره ځانګړې شوې ده، او باید د ښار د منظور شوي پلان مطابق کار پرې وشي.
نوموړی وایي، د موضوع په تړاو اړوند ښاروالۍ ته هم خبر ورکړل شو، تر څو قانوني کړنې ترسره کړي.
دغه راز، د یاد ټیم له خوا د ښار د پلانونو او ښاري نظم په اړه خلکو ته عامه پوهاوی هم ورکړل شو.
د کور او ښار جوړولو وزارت، له دې څارنې څخه موخه د ښاري بېنظمۍ او تخلفاتو مخنیوی، د ښاري پلان تطبیق، او د یو منظم، معیاري او ښایسته ښار جوړول دي.
