لوګر کې د فرمانونو او حکمونو د تعقیب لوی ریاست لپاره نوې اداري ودانۍ ګټې اخیستنې ته وسپارل شوه
۱۴۴۷/۳/۱۷
د کور او ښار جوړولو وزارت په لوګر ولایت کې د فرمانونو او حکمونو د تعقیب او نظارت لوی ریاست اړوند یوه ودانۍ جوړه او ګټې اخیستنې ته وسپارله.
د پرانیستې په دغه مراسمو کې، د لوګر مرستیال والي محترم قاري صلاحالدین ایوبي وویل، یادې ودانۍ ته ځانګړې پاملرنه شوې، ځکه چې دا بنسټ د اسلامي امارت د فرمانونو، عدلي او اداري نظم د تحقق بنسټیزه مرجع ګڼل کېږي.
ښاغلي مرستیال والي وویل، څنګه چې دا ودانۍ د قانون، عدالت او فرمان د تطبیق څخه د نظارت ځای دی، باید هغسې خدمتونه ترسره کړي چې تمه ترې کېږي.
لوګر ولایت کې د کور او ښار جوړولو ریاست محترم رئیس مولوي مطیع الله زاهد وایي، د دغه ولایت د مرکز پُل علم ښار کې یې د فرمانونو او حکمونو د تعقیب او نظارت لوی ریاست اړوند یوه عصري، مجهزه اداري ودانۍ جوړه او ګټې اخیستنې ته وسپارله.
ښاغلی مولوي مطیع الله زاهد وایي، دا ودانۍ د ۲۸ میلیونه افغانیو په مالي لګښت د کور او ښار جوړولو وزارت له خوا جوړه شوه، چې ګټې اخیستنې ته وسپارل شوه.
په مراسمو کې د فرمانونو او حکمونو د تعقیب او نظارت لوی ریاست مرستیال محترم مولوي محمد محسن هاشمي هم خبرې وکړې او د کور او ښار جوړولو له وزارت یې مننه وکړه.
نوموړي زیاته کړه، یاده ودانۍ به د اسلامي امارت د لارښوونو، حکمونو او پرېکړو په معیاري او منظم ډول تعقیب، تنظیم او تطبیق ته زمینه برابره کړي.
هغه د دې پروژې بشپړېدل د اسلامي امارت د بنسټیزو ژمنو یوه نمونه وبلله او زیاته یې کړه چې دا ډول رغنیزې پروژې د هېواد د اداري پیاوړتیا، د خدماتو د ښهوالي، او د ولس اعتماد د ترلاسه کولو لپاره حیاتي ارزښت لري.
لوګر ولایت کې د کور او ښار جوړولو محترم رئیس وایي، دغه ودانۍ د لوګر په مرکز پُل علم ښار کې د ۲۸ میلیونه افغانیو په لګښت جوړه شوه، چې مجهزې اداري خونې، د کار کوونکو لپاره مناسبه فضا، د مراجعينو لپاره انتظار خونه، او اساسي اسانتیاوې لري.
د مراسمو په پای کې ګډونوالو له نوې ودانۍ څخه لیدنه وکړه او د هغې د جوړښت او کیفیت ستاینه یې وکړه.
