د غزني ولایت د ۱۰۰ بستریز روغتون له رغنیزو چارو څارنه وشوه
۱۴۴۷/۲/۰۱
د غزني ولایت د کور او ښار جوړولو ریاست محترم رئیس مولوي نور ولي بلال متقي وایي، د دې ریاست اړوند تخنیکي ټیم د ۱۰۰ بستریز روغتون د اعمار له روانو کارونو څخه نظارت وکړ.
ښاغلي مولوي متقي وویل، په دې پروژه کې د (۱) بلاک لپاره د کړکیو او دروازو د ښیښو د نصب چارې بشپړې شوې دي، خو د المونیمي دروازو د ښیښو نصب لا هم بشپړ شوی نه دی.
د نوموړي په خبره، د نظارت پر مهال، قراردادي شرکت ته سپارښتنه وشوه چې د پروژې کارونه دې ګړندي کړي او پاتې فعالیتونه دې د نقشې، انجنیري مشخصاتو او منظور شویو احجامو مطابق، پر خپل وخت او د لازمي کیفیت سره بشپړ کړي.
یادولو وړ ده، چې د روغتون رغنیزه پروژه به د معیارونو او انجنیري اصولو له مخې تر دوامداره نظارت لاندې وي.
