په استالف ولسوالۍ کې د ښاري سرغړونو د مخنیوي په موخه عامه پوهاوی ترسره شو
۱۴۴۷/۰۱/۰۹
د کور او ښار جوړولو وزارت د ښاري تخلفاتو د رسیدګۍ ریاست تخنیکي او مسلکي ټیم، د یاد ریاست د محترم رئیس مولوي عبدالمنان حقاني تر لارښوونې لاندې، د استالف ولسوالۍ ته سفر وکړ او هلته یې د ښاري نظم او اصولو د پیاوړتیا په موخه د خلکو لپاره پراخ عامه پوهاوي کمپاین ترسره کړ.
ښاغلي مولوي حقاني وویل، یاد پروګرام د استالف ولسوالۍ له اوسېدونکو، قومي مشرانو، ځوانانو، دیني عالمانو او د ساحې د متنفذینو په حضور کې ترسره شو، چې پکې د ښاري سرغړونو زیانونه، د ښاري پراختیا قانوني اصول، او د منظمو جوړښتونو اهمیت په تفصیل سره تشریح شول.
د نوموړي په خبره، د کور او ښار جوړولو وزارت چمتو دی چې د قانوني نقشهجوړولو، تخنیکي مشورو، او منظمو ودانیو په برخه کې له خلکو سره همکاري وکړي.
په دې غونډه کې د ښاري تخلفاتو د ریاست مسوولینو خلکو ته ډاډ ورکړ، چې دغه ریاست به د ټول هېواد په کچه د قانون حاکمیت، ښاري نظم، او منظم پراختیا لپاره خپلو هڅو ته دوام ورکوي.
