د تخار او هلمند ولایتونو کې د ښارګوټو لپاره پلانونه منظور شول
۱۴۴۶/۰۹/۲۹
د کور او ښار جوړولو وزارت هڅې پیل کړي چې په ټولو ولایتونو کې د مسکن کمښت ستونزې ته رسېدنه وشي او هېوادوالو ته د مناسبې سرپناه جوړولو زمینه برابره شي.
د کور او ښار جوړولو وزارت محترم سرپرست وزیر الحاج شیخ حمدالله نعماني په خپل کاري دفتر کې د هلمند ولایت ګرشک ولسوالۍ کې د یو خصوصي استوګنیز ښارګوټي تفصیلي پلان منظور کړ.
دغه پلان د (640) جریبه ځمکې لپاره جوړ شوی چې، تر ویزه کېدو وروسته به یې عملي چارې پیل شي.
په ورته وخت کې محترم نعماني د تخار ولایت سپین زر استوګنیزې مجتمع تفصیلي پلان منظور کړ.
د کور او ښار جوړولو وزارت تمه لري چې، د منظمو پلانونو په تطبیق سره به هېواد کې د منظمې ښاري ودې او پراختیا او دغه راز د مناسب مسکن جوړولو لپاره زمینه برابره شي.
دغه چاره به پانګوالو ته لاره پرانیزي چې په ډاډه زړه پانګونه وکړي او معیاري مسکن رامنځته کړي.
