د کور او ښار جوړولو وزارت سرپرست شیخ حمدالله نعماني، محصلینو ته په خطاب کې
۱۴۴۶/۰۸/۰۵
د کور او ښار جوړولو وزارت محترم سرپرست وزیر الحاج شیخ حمدالله نعماني، د کابل پولتخنیک پوهنتون کې محصلینو ته د افغانستان په تېر او راتلونکې خبرې وکړې.
ښاغلي شیخ حمدالله نعماني وویل، د ایمانونو پر تقوې کار وکړئ، ځکه په خبره یې د انسانانو او ټولنو عروج او زوال د ایمانونو تقوې او کمزورتیا پورې تړاو لري.
نوموړي محصلینو ته په خطاب کې وویل، ځان په اسلام پوه کړئ او ټول علوم زده کړ، چې د افغانستان او اسلامي ټولنې راتلونکی تاسې پورې تړاو لري.
هغه زیاته کړه، شل کاله پر افغان خاوره د اشغالګرو له لوري هر اړخیز تعصب ته کار شوی او اوس ټولنه د امید سترګې تاسې ته لري چې، باید د عروج تر لوړو څوکو یې ورسوئ.
ښاغلي نعماني وویل، غربي نړۍ هڅې کوي چې، افغانستان وروسته پاتې شي، خو اسلامي امارت به د الله ج پر دین د عمل کولو له لارې او د مسلمان افغان پر مټ دا خاوره له سیالانو سره سیال کوي.
د نوموړي ټینګار پر دې و چې، د بریا لاره یوازې پر اسلام عمل کول دي او هغه څوک به له ناکامۍ سره مخامخ شي، چې د اسلام دین پر وړاندې بې پروا شي.
د غونډې په پای کې محصلینو خپلې پوښتنې مطرح کړې، وړاندیزونه یې شریک کړل او خوښي یې څرګنده کړه چې، د اسلامي امارت مسؤلین د هېواد علمي کادرونو ته ارزښت ورکوي.
