په ښارګوټو کې د بیخ بناء چارو جوړولو په موخه د طرزالعمل په غني کولو خبرې وشوې
۱۴۴۶/۰۷/۲۸
د کور او ښار جوړولو وزارت د محترم سرپرست وزیر الحاج شیخ حمدالله نعماني په مشرۍ د دغه وزارت رهبري غونډه وشوه.
غزني ولایت ته د تعدیل برخه کې د تللي هیئت د کاري راپور څرنګوالی، په غیر پلاني ساحو کې د محترمو ښاروالیو په غوښتنه د بهسازۍ پلان جوړول، ولایتونو کې د کور او ښار جوړولو ریاستونو په چارو کې د خنډ او ځنډ مخنیوی او په ښارګوټو کې د بیخ بناء چارو جوړولو کې د خصوصي سکتور پر پانګونې او د چارو چټکتیا د طرزالعمل په غني کولو بحثونه وشول.
ښاغلي شیخ حمدالله نعماني د پورته ذکر شوو موضوعاتو په کیفیت، کمیت او چټکتیا ټینګار وکړ او د طرزالعمل غني کولو برخه کې یې مشخصې کمېټې ته دنده وسپارله چې، ټولې ستونزې په ګوته کړي، د ستونزو لاملونه په نښه کړي او د حل او غني کېدا لپاره یې منطقي دلایل او حل لارې وړاندې کړي.
محترم وزیر وویل، یاده کمېټه دې، د تېرو قراردادونو له امله د راپېښو شوو ستونزو څېړنه وکړي، ځکه په خبره یې، ځینې خصوصي شرکتونه د ښارګوټو او ښارونو د بیخ بناء جوړولو په چارو کې قرارداد کوي، له خلکو پیسې راټولوي او بیا په وخت اقدام نه کوي.
نوموړي وویل، همدا لامل دی چې د ځینو ښارګوټو او سیمو ابادۍ تر اوسه ځنډېدلي، د خلکو پیسې ځنډول شوي او خدمات نه وړاندې کېږي.
د طرزالعمل په غني کېدا سره به وزارت خصوصي شرکتونه لا زیات مکلف وګرځوي، تر څو قرارداد شوې چارې په وخت، ښه کیفیت او د پلان او نقشې مطابق سرته ورسوي او د ابادۍ چارې به ورسره چټکتیا پیدا کړي.
د کور او ښار جوړولو وزارت هڅې کوي چې، په ښارګوټو کې د پانګونې لپاره حقوقي مبنا لا پیاوړې کړي او خلکو ته غوره خدمات وړاندې کړي.
