د مالي ستونزو د حل او د نیمه کاره پروژو د پیل په تړاو ناسته وشوه
۱۴۴۶/۴/۴
د کور او ښار جوړولو وزارت د محترم مالي او اداري مرستیال الحاج محمد ارسلاح خروټي په مشرۍ د دې معینیت اړوندو ریاستونو رئیسانو او مسؤلینو په کور او ښار جوړولو وزارت کې د مالي ستونزو د حل او د نیمه کاره پروژو د پیل په تړاو ناسته وکړه.
په ناسته کې، د روان کال لپاره د عادي او پراختیایي بودیجې د کچې، لګښت او د شته ستونزو په تړاو مالي ریاست معلومات وړاندې کړل.
دغه راز، خبرې وشوې چې یو شمېر پروژې په نیمه کاره حالت کې پاتې دي او اړتیا ده چې پاتې چارې یې پیل، بشپړې او ګټې اخیستنې ته وسپارل شي.
د غونډې برخه والو وویل، اړتیا ده چې د ځینو پروژو قراردادونه تعدیل، وخت تمدید او اړوند شرکتونه چمتوالی وښیي.
د دوی په خبره، د ځینو پروژو بیا پیل لپاره اړتیا ده چې ځینې لومړنۍ چارې له مخکې پیل او تیاری ونیول شي.
ښاغلي مالي او اداري مرستیال الحاج محمد ارسلاح خروټي وویل، د روان کال په منځ کې د شته نیمه کاره پروژو ترڅنګ دې ځینې نورې ټولګټې او عوایدي پروژې ترتیب او د بودیجې منظورۍ په موخه دې یې وړاندیز شي.
نوموړي ټینګار وکړ، چې څومره ژر کېدای شي چارې دې یې پیل او خنډونه دې له منځه یوړل شي.
په ناسته، کې د پالیسۍ او پلان ریاست ته دنده وسپارل شوه چې شته پروژې او نورې عام المنفعه او عوایدي پروژې دې له کانسیپټ نوټونو سره له ریاستونو وغواړي او په بله ناسته کې دې یې غونډې ته وړاندې کړي.
په یاده ناسته کې، مالي برخه کې په ځینو نورو موضوعاتو هم خبرې وشوې او د چارو د چتکتیا په موخه لازم تصمیمونه ونیول شول.
