له دې وروسته به د غزني په مقر او اندړو ولسوالیو کې منظمه ښاري پراختیا رامنځته شي
۱۴۴۵/۱۱/۱۰
غزني کې د کور او ښار جوړولو ریاست محترم رئیس مولوي بلال متقي وایي، هڅې یې پیل کړي چې د مرکزي ښار ترڅنګ په ولسوالیو کې هم د غیرې منظمې او غیر پلاني ښاري ودې او پراختیا مخنیوی وکړي.
محترم مولوي بلال متقي وایي، د غزني د مقر او اندړو ولسوالیو لپاره یې تفصیلي پلانونه چمتو او د یادو ولسوالیو محترمو ښاروال صاحبانو او یوه یوه کاپي یې د یادو ولسوالیو محترمو ولسوالانو ته تسلیم کړې.
د نوموړي په خبره، یاد تفصیلي پلانونه د غزني ولایت د معاونیت محترم مقام کې تسلیم شول چې د تسلیمۍ په مهال د غزني ولایت محترم مرستیال والي مولوي رحیم الله محمود هم شتون درلود.
ښاغلي متقي زیاته کړه، د تفصیلي پلانونو په جوړېدو او تطبیق سره به د ولسوالیو په بازارونو کې ودانیزې چارې د پلان مطابق مخته ولاړ شي او د غیرې قانوني مارکېټونو، هټیو، او نورو ودانیزو چارو د جوړېدو مخنیوی به وشي.
هغه وایي، په پام کې لري چې د نورو اړونده همکارو ادارو په مرسته به د پلانونو جوړولو پروسه نورو ولسوالیو ته هم وغځوي او د ټولو ولسوالیو لپاره به تفصیلي پلانونه جوړکړي.
