د یو افغاني خصوصي شرکت د شکایت ارزونه وشوه
1/11/1443
د ښار جوړولو او ځمکو وزارت محترم سرپرست مولوي حمدالله نعماني، د رییس الوزرا محترم دفتر استازي، سوداګرۍ او صنایعو محترم وزارت استازي او د مالیې محترم استازي په ګډون له یو ملي پانګوال او سوداګر سره وکتل او د هغه کړی شکایت یې و ارزاوه.
د ارزونې په دغه ناسته کې پانګوال د خپل شرکت او یو بل بهرني شرکت ترمنځ د تړون په اړه خبرې وکړې، هغه ستونزې یې په ګوته کړې چې له امله یې دوی د شکایت تر کچې رسېدلي او د حل برخه کې یې د همکارۍ غوښتنه وکړه.
د پورته ذکر شوې د ستونزې د حل په موخه د اسلامي امارت په کچه د ښار جوړولو او ځمکو وزارت د محترم سرپرست مولوي حمدالله نعماني په مشرۍ لوړ رتبه هیئت ګمارل شوی چې له څېړنو او پوښتنو وروسته پرېکړه وکړي.
محترم وزیر مولوي حمدالله نعماني وویل، دوی به د شته اسنادو او شواهدو په رڼا کې څېړنه وکړي او د یوې مناسبې حل لارې په موندلو به پرېکړه وکړي.
نوموړي زیاته کړه، په ټوله کې د اسلامي امارت تګلاره دا ده چې هېڅ لوری باید زیانمن نه شي او ټولو ته په افغانستان کې د دوی حقه حقوق ورکړل شي او له امتیازاتو برخمن شي.
د دغې ناستې په پای کې پرېکړه وشوه چې دوی به یاد شرکت ته استعلامونه ورکوي او هغوی به یې مطابق جواب ورکوي چې هغې ته په کتو به وروستۍ پرېکړه کېږي.
مولوي نعماني یادونه وکړه، چې افغانستان کې د پانګوالو ستونزو ته پر وخت رسېدنه کېږي او هر چاته به زمینه برابره کړي چې وکولی شي په ارام او ډاډمن زړه خپل کار وبار پیل کړي.
