په ښار جوړولو او ځمکو وزارت کې یو باب مسجد پرانستل شو
۱۴۴۳/۱۰/۲۹
د ښار جوړولو او ځمکو وزارت په انګړ کې یو باب مسجد د یاد وزارت د سرپرست محترم مولوي حمدالله نعماني په امامت د ماسپښين لمونځ اداء کولو وروسته پرانستل شو.
د یاد مسجد د پرانستې په مراسمو کې د یاد وزارت سرپرست وزیر محترم مولوي حمدالله نعماني، د دغه وزارت مالي او اداري مرستیال حافظ محمد امین فاروقي، رییسانو او یو شمېر نورو هېوادوالو ګډون کړی وو.
د ماسپښین لمونځ له اداء کولو وروسته ښاغلي مولوي حمدالله نعماني د مسجدونو د فضایلو او اهمیت په تړاو د قران او نبوي احادیثو په رڼا کې هر اړخیز معلومات وړاندې کړل.
نوموړي د وزارت له ټولو کارکوونکو غوښتنه وکړه چې لمونځونه په جماعت اداء کړي او ورسره په دیني برخه کې زده کړې هم وکړي.
د پرانستې مراسمو په مهال د ښار جوړولو او ځمکو وزارت د ارشاد او دعوت رییس محترم مولوي عبدالاحد حقاني د په جمعې سره د لمونځ کولو فضایل او پر ټولنیز او اقتصادي ژوند یې د هغې پر اغېزو بحث وکړ.
مولوي عبدالاحد حقاني د خپلو خبرو پر دوام د امیرانو پر اطاعت کولو هم ټینګار وکړ او کارکوونکو ته یې سپارښتنه وکړه چې خپل صورت او سیرت په اسلام برابر کړي.
د یادونې وړ ده چې له دې وړاندې هم په یاد وزارت کې یو باب مسجد و، خو په یو وخت کې یې د کمو لمونځ کوونکو ظرفیت یې درلود.
