د ښا رجوړولو او ځمکو وزارت د ځمکو په وېش سره له صنعت کارانو ملاتړ کوي
۱۴۴۳/۰۹/۰۵
د ښار جوړولو او ځمکو وزارت سرپرست محترم مولوي حمد الله نعماني په یاد وزارت کې د افغانستان د صنعت کارانو تولنې له مسؤلینو او صنعت کارانو سره وکتل او د هغوی د ستونزو د حل په اړه یې هر اړخیزې خبرې وکړې.
په دغه ناسته کې د صنعت کارانو ټولنې غړو د تولیدي فابریکو د فعالیت او تولید په اړه معلومات وړاندې کړل او هغه ستونزو او ننګونو ته یې اشاره وکړه چې له هېواده د پانګې د تېښتې لامل شوي دي.
د افغانستان د صنعت کارانو ټولنې مشر عبدالجبار صافي یادونه وکړه چې دمګړۍ زیات شمېر صنعت کاران د خپل ځای له نشتون سره مخامخ دي او په کرایه ځایونو کې فعالیت کوي چې د دوی د چارو پر وړاندې یې ګن شمېر ستونزې او خندونه رامنځته کړي دي.
صافي له ښار جوړولو او ځمکو وزارت څخه غوښتنه وکړه چې افغان صنعت کارانو ته مناسب ځایونه ورکړي ترڅو خپل تولیدي فعالیت پیل کړي.
د ښار جوړولو او ځمکو وزارت سرپرست ښاغلي مولوي حمد الله نعماني راغلو صنعت کارانو ته په خطاب کې وویل، په ټوله کې د افغانستان اسلامي امارت او په ځانګړې توګه د ښار جوړولو او ځمکو وزارت رهبري له داخلي تولید او صنعت ملاتړ کوي.
نوموړي زیاته کړه چې وزارت به پانګوالو ته د تولیدي فابریکو جوړولو په موخه مناسبه او پاکه ځمکه ورکړي چې هېڅ نوع شخړه ونه لري او صنعت کار وکولی شي په ارام او بشپړ ډاډ فعالیت پیل کړي.
