د ښار جوړولو او ځمکو وزارت د مسکن او ښارګوټو برخه کې د خصوصي سکتور له پانګونې ملاتړ کوي
۱۴۴۳/۰۹/۰۲
د ښار جوړولو او ځمکو وزارت سرپرست محترم مولوي حمد الله نعماني په خپل کاري دفتر کې له ملي پانګوال او سوداګر زید حیدري سره وکتل.
دواړو لوریو په دې بحث وکړ چې څنګه کېدای شي افغانستان کې د مسکن او نورو برخو کې پانګونه وشي.
په دغه لیدنه کې چې د پېروزي ښارګوټي مسؤل عبیدالرحمن حقیار هم ګډون کړی و، پر دې خبرې او نظریات تبادله شول چې د خصوصي سکتور په ګډون په پېروزي ښارګوټي کې د خلکو د وسې او توان مطابق څه ډول کورونه جوړ او ګټې اخیستنې ته چمتو شي.
د وزارت رهبري او پانګوال ، دواړو ټینګار پر دې و چې وضعیت ته په کتو د خلکو د وسې مطابق کورونه باید جوړ شي چې هر اړخیزې اسانتیاوې ولري، معیاري او د وخت ټولې اړتیاوې پوره کړای شي.
د ښار جوړولو او ځمکو وزارت سرپرست محترم مولوي حمد الله نعماني د ملي پانګوال او سوداګر زید حیدري هرکلی وکړ چې اراده یې کړې په پېروزي ښارګوټي کې د مسکن او نورو برخو کې پانکونه وکړي.
په دغه کار سره به چې کورونه په څو پړاوه قسطونو ورکول کېږي د ډیری بې سرپناه هېوادوالو ستونزه حل او خلکو ته به د کار کولو زمینه برابره شي.
مولوي حمد الله نعماني زیاته کړه چې د ښار جوړولو او ځمکو وزارت له ادرسه یې ملي او نړیوالو پانګوالو ته زمینه برابره کړې چې راشي او افغانستان کې پانګونه وکړي چې دوی به ترې بشپړ ملاتړ کوي.
د یادونې وړ ده چې د ملي پانګوال او سوداګر زید حیدري او د ښار جوړولو او ځمکو وزارت سرپرست محترم مولوي حمد الله نعماني ترمنځ دا دویمه ناسته چې ترسره کېږي چې په کې د ۲۰۰۰ کورونو د جوړولو په پړاونو، تخنیکي اړخونو، قسطونو او اسنادو په اړه بشپړې خبرې وشوې او تمه ده چې ډېر ژر به یې په ساحه کې عملي چارې پیل شي.
