ارزګان ولایت کې د مهاجرینو ښارګوټي د عامه تاسیساتو او سړکونو د جوړولو چارې پیل شوې
۱۴۴۷/۷/۱
د ژمي موسم راتګ له رارسېدو او د هوا له سړېدو سره، چې ورسره ورسره د مهاجرینو لپاره د دایمي اوسېدو د زمینې برابرېدو په پار هڅې ګړندۍ شوې دي.
د کور او ښار جوړولو وزارت محترم وزیر الحاج مولوي نجیب الله حیات حقاني، ټینګار کوي چې په ټولو ولایتونو کې دې د مهاجرینو د دایمي اوسېدو په پار د ښارګوټو چارې چټکې او د وېش لپاره دې یې زمینه برابره شي.
تازه ارزګان ولایت کې د مهاجرینو په ځانګړي ښارګوټي کې د عامالمنفعه تاسیساتو او لارو د جوړولو چارې په رسمي ډول پیل شوې.
دغه ښارګوټی به د ښاري اصولو او معیاري پلان له مخې جوړ شي، څو راستنو شویو اړمنو مهاجرو کورنیو ته د استوګنې مناسب، خوندي او باعزته چاپېریال برابر شي.
د ارزګان ولایت د مهاجرینو ښارګوټی به په ټولیز ډول په ۲۳۹۵ جریبه ځمکه کې جوړ شي، چې په کې به ټول اړین خدمات، عامه تاسیسات او ښاري اسانتیاوې په پام کې ونیول شي.
دغه ښارګوټی به ۱۷۴۰ معیاري استوګنیزې نمرې ولري او د اوسېدونکو د بنسټیزو اړتیاوو د پوره کولو په موخه به په کې د سړکونو، عامه تاسیساتو او نورو اړینو زیربناوو جوړولو ته ځانګړې پاملرنه هم وشي.
د دې پروژې عملي کېدل به د راستنو شویو مهاجرینو کورنیو د ژوند د ښه والي ترڅنګ، د ښاري نظم او پرمختګ په برخه کې هم مهم ګام وي.
