مدیریتي چارې دې ډیجیټل شي
۱۴۴۳/۰۸/۲۷
د ښار جوړولو او ځمکو وزارت مالي او اداري مرستیال محترم حافظ محمد امین فاروقي د اداري ناستو او فعالیتونو په دوام دا ځل د دغه وزارت د معلوماتي ټکنالوجۍ (IT) د ریاست له مسؤلینو سره وکتل.
په دغه کتنه کې د معلوماتي ټکنالوجۍ ریاست مسؤلینو د خپلو فعالیتونو، تشکیلاتو ، دندو، ستونزو او ننګونو په اړه بشپړ معلومات وړاندې کړل.
د ښار جوړولو او ځمکو وزارت مالي او اداري مرستیال ښاغلي حافظ محمد امین فاروقي وویل، په هره اداره او وزارت کې معلوماتي ټکنالوجۍ (IT) مهمه برخه ده او باید د دغه ریاست کارکوونکي خپل مسؤلیتونه په سمه توګه پر مخ یوسي او په خپله برخه کې دې زمینه برابره کړي چې ټول د معلوماتي تکنالوجۍ له اسانتیاوو ګټه پورته کړي.
نوموړي سپارښتنه وکړه چې له شته امکاناتو په ګټې اخیستنې سره دې امنیتي کمرې فعاله کړي او د وزارت ټولې ستونزې دې تر یو بریده حل کړي.
ښاغلي فاروقي زیاته کړه چې په وزارت کې باید اداري چاري ډیجیټل شي او ټول فعالیتونه دې په ډیجیټل سیستم پر مخ روان شي.
دغه راز محترم مالي او اداري مرستیال د معلوماتي ټکنالوجۍ ریاست مسؤلینو ته توصیه وکړه چې خپل هېواد او نظام ته ژمن اوسي، چارې دې په ښه توګه ترسره کړي او د نن کار دې سبا ته نه پرېږدي.
