د ښار جوړولو او ځمکو وزارت اړوند د پروژو مسؤلین دې خپل مسؤلیت اداء کړي
۱۴۴۳ – شعبان المبارک – ۲۵ ـــــــــــــــ ۱۴۰۱/۰۱/۰۸
د ښار جوړولو او ځمکو وزارت مالي او اداري مرستیال محترم حافظ محمد امین فاروقي د دغه وزارت د اداري ریاست مسؤلین وربللي وو او د مسؤلیتونو او ستونزو د حل په موخه یې ورسره ناسته وکړه.
د اداري ریاست مسؤلینو د ۱۴۰۱ کال لپاره د خپل فعالیت ، وړاندیزونو او شته ستونزو د حل په موخه بشپړې خبرې وکړې چې د ښاغلي مالي او اداري مرستیال حافظ محمد امین فاروقي له لوري ورته د ګام په ګام حل ډاډ ورکړل شو.
د اداري ریاست مسؤلین وایي، هڅې یې پیل کړي چې له شته وسایلو او جنسونو چې بیت المال دي سالمه ساتنه یې وکړي او د بیا ځل لپاره ترې کار واخیستلی شي.
ورپسې د ښار جوړولو او ځمکو وزارت مالي او اداري مرستیال محترم حافظ محمد امین فاروقي د بیت المال په سالم ساتلو ټینګار وکړ او د حفظ او مراقبت مسؤلینو ته یې دنده وسپارله چې په ټولو دفترونو وګرځي او هر ځای او جنس چې ترمیم او رغولو ته اړتیا لري باید اقدام وکړي.
دغه راز ښاغلي حافظ محمد امین فاروقي یادونه وکړه چې د پروژو ټول مسؤلین به وروغواړي او د خپلو حسابونو د تصفیې په اړه به ورسره خبرې وکړي.
نوموړي سپارښتنه وکړه چې په وزارت کې دې چارې چټکې او معیاري شي او هر کار کوونکی دې خپل مسؤلیت په سمه توګه اداء کړي.
