په غزنی کې څه باندې ۲۰۳ زره جریبه دولتي ځمکه ثبت او سروې شوه
ښار جوړولو او ځمکو وزارت په هېواد کې د دولتي ځمکو بانک برنامې د پلي کېدو پر مهال د غزنی ولایت اړوندو سېمو په ۹۶ قطعو کې ۲۰۳۶۷۲ جریب دولتي ځمکه او ملکیتونه ثبت او سروې کړي دي.
له دې شمیېر څخه، ۲۰۲۱۳۴ جریبه سپینه دولتي ځمکه او پاتې ۱۵۳۸ جریبه د دولت تر استفادې لاندې عامه ملکیتونه دي چې د د ې ولایت په مرکز او بیلابیلو ولسوالیو کې سروې او ثبت شوي دي.
ښار جوړلو او ځمکو وزارت تر دې دمه د هېواد په ۲۸ ولایتونو کې ۶ مېلیونه، ۴۳۸ زره او ۳۴۹ جریبه دولتي ملکیتونه او ځمکې چې ۶۶۵۱ قطعې کېږي، سروې او ثبت کړي او دا وزارت ژمن دی چې د دې پروسې له لارې په هېواد کې د حکومت سترو پرمختیايي او اقتصادي پلانونو پلي کېدو ته زمینه برابره کړي.
