د کابل ښار په پنځمه ناحیه کې د شنې ساحې د غیرقانوني جوړولو چارې ودرول شوې
۱۴۴۸/۴/۱۳
د کور او ښار جوړولو وزارت کنترول، کیفیت او د ښاري سرغړونو د مخنیوي عمومي ریاست اړوند د ښاري سرغړونو د مخنیوي ریاست تخنیکي ټیمونو د کابل ښار د پنځمې ناحیې د سپین کلي څلورلارې په اووم ګذر کې د شنو ساحو د څارنې، ارزونې او عامه پوهاوي په موخه نظارت ترسره کړ.
د نظارت پر مهال څرګنده شوه چې په یاده شنه ساحه کې د ودانیزو چارو لپاره کرښې ایستل شوې او شاوخوا یې جال لګول شوی دی.
د موضوع د څېړنې په موخه، تخنیکي ټیم په ساحه کې روان کارونه ودرول او اړوندو مسؤلینو ته یې رسمي استعلام وسپاره، څو خپل اسناد او جوازونه د ښاري سرغړونو ته د رسېدنې ریاست ته وړاندې کړي.
د دې اقدام موخه د شنو ساحو ساتنه، د ملکیتونو او ودانیزو چارو د اسنادو او نقشو ارزونه، د ښاري سرغړونو مخنیوی او د منظور شوو ښاري پلانونو تطبیق دی.
د یاد ریاست د منظم نظارتي پلان له مخې، د کابل ښار په بېلابېلو سیمو کې د څارنې او عامه پوهاوي چارې دوام لري، څو د ښاري اصولو او مقرراتو د رعایت ډاډ ترلاسه او د شنو ساحو د خپلسري نیولو او ودانیزو سرغړونو مخه ونیول شي.
