د خوست ولایت د شیخ زاهد پوهنتون د استادانو او کارکوونکو لپاره د ښارګوټي د جوړولو تفصیلي پلان منظور شو
ښار جوړولو او ځمکو وزارت سرپرست وزیر محترم محمود کرزی د شیخ زاهد پوهنتون د استادانو سره په کتنه کې د خوست ولایت د شیخ زاهد پوهنتون د استادانو او کارکوونکو لپاره د ښارګوټي د جوړولو تفصیلي پلان منظور کړ.
د دې ښارګوټي په تفصیلي پلان کې ټول اړین اسانتیاوې لکه استوګنیزې، تجارتي، شنې، تفریحي او خدماتي سیمې، سړکونه، پلې لارې، مسجدونه، ښوونځي، کلینیکونه، وړکتون، اجتماعي ساحې، کتابتون، بانک او د موټرو تم ځای ځانګړي شوي او په پام کې ده چې یاد ښارګوټي په ۲۰۹ جریبه ځمکه کې جوړ شي.
د ویلو ده چې په تېرو درې میاشتو کې ۲۵ پراختیايي پلانونه (۸ تفصيلي پلانونه، ۱۰ ستراتیژیک پلانونه، ۲ منطقوي پلانونه او ۵ د بهسازۍ پلانونه) د ښارجوړولو او ځمکو وزارت د مشرتابه له لوري منظور شوي چې په تطبیق سره به یې څه باندې ۲۰ زره کورنیو ته د استوګنې زمینه برابره شي، ښارونه او ولسوالۍ به په منظمه توګه وده وکړي او غیر رسمي او غیر پلاني سیمې به په ښو استوګنیزو سیمو بدلې شي.
ښار جوړولو او ځمکو وزارت د دولتي ځمکو د تنظیم او مدیریت او ښاری پراختیا له لاري، د ټولګټو پروژو او د حکومت پراختیايي او اقتصادي پالیسیو او پلانګذاریو د تطبیق لپاره د دولتي ځمکو څخه د سمې او معقوله استفادې چې پایله یې د خلکو هوساینه او اقتصادي وده ده، زمینه برابروي.
###
