محترم محمود کرزی: هېڅ ډول خنډ او ځنډ د رغنیزو پروژو د تطبیق پر وړاندې د منلو نهدی
د ښارجوړولو او ځمکو وزارت سرپرست وزیر محترم محمود کرزي، د سرحداتو او قبایلو چارو سرپرست وزیر محترم محب الله صمیم او د پکتیکا ولایت دسلیمانخیلو قومي مشر محترم محمود خان سلیمانخیل سره په کتنه کې په پکتیکا ولایت کې د ساختماني پروژو په تطبیق بحث او خبرې وکړې.
د غونډې په پیل کې د پکتیکا ولایت د سلیمانخیلو قومي مشر محترم محمود خان سلیمانخیل په دې ولایت کې د رغنیزو پروژو په اړه معلومات وړاندې کړل او د ښارجوړولو او ځمکو وزارت له رهبرۍ څخه یې وغوښتل څو د ساختماني پروژو په تطبیق او پر وړاندې یې د شته خنډونو د لمنځه وړولو، متاقضي ادارو ته د دولتي ځمکو د انتقال، د دولتي ځمکو حقوقي ستونزو او همداراز د دې ولایت لپاره د پلان شویو پروژو د تطبیق په برخه کې دې ورسره مرسته وکړي.
ورپسې د سرحداتو او قبایلو چارو سرپرست وزیر محترم محب الله صمیم د هېواد په ابادۍ کې د ښارجوړولو او ځمکو وزارت کړنې د پام وړ وبللې او ډاډ یې څرګند کړ چې د سرحدونو او قبایلو چارو وزارت په ولایتونو کې د دولتي ځمکو د حقوقي ستونزو د حل په برخه کې هر راز همکارۍ ته چمتو دی.
په همدې ترتیب، د ښارجوړولو او ځمکو وزارت سرپرست وزیر محترم محمود کرزي په هېواد کې پر متوازن انکشاف د ټینګار ترڅنګ وویل چې ښارجوړولو او ځمکو وزارت د هېواد په بېلابېلو ولایتونو کې په سلګونه رغنیزې پروژې تر کار لاندې لري او پر وړاندې یې هیڅ ډول خنډ او ځنډ ورته د منلو وړ نه دی.
د ښارجوړولو او ځمکو وزارت سرپرست وزیر د رغنیزو پروژو د تطبیق په برخه کې د خلکو همکاري اړینه وبلله او اړونده مسولینو ته یې هدایت ورکړ څو په پکتیکا ولایت د رغنیزو پروژو پر وړاندې شته ستونزې ژر حل او د یوشمېر نورو رغنیزو پروژو تطبیق ته دې هم زمینه سازي وکړي.
په پای کې د ښارجوړولو او ځمکو وزارت سرپرست وزیر محترم محمود کرزي او د سرحدونو او قبایلو چارو سرپرت وزیر محترم محب الله صمیم د دواړو وزاتونو ترمنځ په همغږئ او ګډ کار ټینګار وکړ.
###
