په کابل کې د چین هېواد په مالي مرسته د نيله باغ پروژې د لومړي فاز رغنیزې چارې پیلېږي
د افغانستان په پلازمېنې کابل ښار کې د چین هېواد په مالي مرسته د نيله باغ پروژې د لومړي فاز رغنیزې چارې پیلېږي. دا ښارګوټی د دواړو هېوادونو له ګډو او مهمو پروژو څخه دی.
د دې ښارګوټي لومړی فاز پر ۲۱ هکټاره ځمکه د کابل ښار په دارالامان سیمه کې د چین هېواد د ۷۱ میلیون ډالرو په مالي مرسته جوړیږي.
د دې ښارګوټي د لومړي فاز تړون د ښار جوړولو او ځمکو وزارت او د MCC19 تطبیق کوونکي شرکت ترمنځ په ولسمشرۍ ماڼۍ کې لاسلیک شو چې له مخې به یې د دې ښارګوټي د لومړي فاز زیربنایي او ساختماني چارې په راتلونکو ۴۰ میاشتو کې بشپړې او ګټه اخېستنې ته وسپارل شي.
د دې ښارګوټي په لومړي فاز کې ۵۶ استوګنیز بلاکونه چې ۱۴۰۰ مسکوني واحدونه کېږي، په پام کې نیول شوي، چې د ۱۴۰۰ مسکوني واحدونو له ډلې، ۲۸۰ یې څلور اتاقه، ۵۶۰ یې درې اتاقه او پاتې ۵۶۰ یې دوه اتاقه دي.
د عصري سړکونو او پلي لارو او د سرسبزۍ لپاره د قطره یې اوبو سېسټم جوړول، د موټرو پراخ تمځای، د فاضله موادو د مدیریت پرمتخللی سېسټم او تصفیه خونې، د اوبو او برېښنا منظمې شبکې، د انټرنېټ او ارتباطي سېسټمونو نصبول، د اوبو زیرمو جوړول، د هر مسکوني واحد لپاره جلا د تودوخي سېسټم، زرغونه سیمه، ټولنیز او تفریحي پارکونه او سوداګریزې او خدماتي سیمې د دې ښارګوټي د لومړي فاز په تفصیلي پلان کې شامل دي.
د دې پروژې د لومړي فاز په بشپړېدو سره به مسکوني واحدونه د ملکي خدماتو مامورینو ته ووېشل شي او د دې پروژې تطبیق به تر ډېره بریده د کابل ښاریانو د کور نه شتون ستونزه حل، د خلکو پر ټولنیز او اقتصادي ژوند کې د پام وړ بدلون رامنځته او داسې ورته پروژو لپاره د خصوصي سکټور او تمویلوونکي بنسټونه پانګونې ته زمینه برابره شي.
د افغانستان او چین هېوادونو ترمنځ د همکاریو هوکړه لیک د ۲۰۱۵ کال د نومبر د میاشتې په ۳مه نیټه د چین هیواد له خوا افغانستان کې د لس زره کورونو د جوړولو په تړاو لاسلیک شو چې نن له نیکه مرغه د دې پروژې د لومړي فاز د جوړولو قرار داد چې ۱۴۰۰ مسکوني واحدونه کیږي د ښار جوړولو او ځمکو وزارت او د MCC19 تطبیق کوونکي شرکت ترمنځ لاسلیک شو.
د دې ښارګوټي د لومړي فاز د ځمکې د تصفیې او د مالکیت حق د تثبیت چارې او همدارنګه د یاد ښارګوټي لپاره تفصیلي پلان د ښار جوړولو او ځمکو وزارت له خوا بشپړ شوی او د دې پروژې تدارکاتي چارې د تدارکاتو ملي ادارې ته وسپارل شوې چې له نیکه مرغه د دې پروژې لومړی فاز د روان کال د غويي په ۲۷ مه د ملي تدارکاتو د کمیسیون له لوري منظور شو.
###
