ښارجوړولو او ځمکو وزارت سرپرست وزیر د ټولګټو وزارت له سرپرست وزیر سره په کتنه کې د یاد وزارت د پروژو د استملاک چارو په ګړندیتوب ټینګار وکړ
ښارجوړولو او ځمکو وزارت سرپرست وزیر محترم محمود کرزي د ټولګټو وزارت له سرپرست وزیر محترم یما شمس سره په کتنه کې د یاد وزارت د پروژو استملاک پر څرنګوالي بحث او خبرې وکړې.
لومړی، د ټولګټو وزارت سرپرست د دې وزارت اړوند پروژو د استملاک په برخه کې د شته ستونزو په اړه بشپړ معلومات ورکړل او په دې برخه کې د همکارۍ غوښتوونکی شو.
ورپسې، د ښارجوړولو او ځمکو وزارت د ځمکوالۍ چارو مرستیال محترم ګل رحمان توتاخیل او د استملاک او بیا مېشتېدو رئیس محترم ناصر ایوبي د ټولګټو وزارت پروژو د استملاک په برخه کې د شویو پرمختګونو په اړه هراړخیز معلومات ورکړل.
همدارنګه د ښارجوړولو او ځمکو وزارت سرپرست وزیر محترم محمود کرزي د حکومت ټولګټو پروژو تطبیق ته زمینه سازي د دې وزارت لومړیتوب یاد کړ زیاته یې کړه، چې د ښارجوړولو او ځمکو وزارت رهبري د پروژو استملاک په برخه کې د ټولګټو وزارت او نورو متقاضي ادارو سره هر ډول همکارۍ ته چمتو دی.
د ښارجوړولو او ځمکو وزارت سرپرست وزیر د ټولګټو وزارت څخه وغوښتل چې د استملاک په برخه کې خپلې ټولې شته ستونزې را برسېره او د ښارجوړولو او ځمکو وزارت سره دې شریک کړي څو د یادو ستونزو د حل او د پروژو د استملاک په برخه کې جدي اقدامات ترسره شي.
په همدې ډول، محترم محمود کرزي د ځمکوالۍ چارو معینیت ته هدایت ورکړ څو د ټولګټو وزارت تخنیکي ټیم سره په همغږئ د ګډو فعالیتونو او د پروژو استملاک د چټکتیا په موخه دې د روانې اوونۍ تر پایه پورې د عمل یو واضح پلان ترتیب او ورستۍ کړي.
همداراز، د ځمکوالۍ چارو معینیت ته هدایت ورکړل شو څو د دې وزارت د استملاک او بیا مېشتېدو ادارې د ظرفیت لوړولو، د نویو ظرفیتونو په استخدام او د ملاتړو کوونکو او حکومتي ادارو د تخنیکي همکاریو د را جلبولو په برخه کې ډېره هڅه وکړي.
په پای کې دواړو لوریو د استملاک په برخه کې د دواړو ادارو په مسولیتونو او همداراز د مهمو پروژو د تطبیق په برخه کې په ګډ کار او د همکاریو د یوې هوکړې په لاسلیک ټینګار وکړ.
###
