کندز ولایت کې پر بېرته راستنېدونکو کډوالو د نمرو د وېش بهیر پیل شو
۱۴۴۶/۱۰/۲۴
د کور او ښار جوړولو وزارت محترم سرپرست وزیر الحاج شیخ حمدالله نعماني، چې د دایمي مېشتېدنې کمېټې مشري په غاړه لري، کندز ولایت کې له ګاونډیو هېوادونو راغلو بې وزله کورنیو ته د نمرو د وېش بهیر پیل کړ.
ښاغلي شیخ حمدالله نعماني وویل، دا تصور ورسره دی چې څنګه کېدای شي د خپلو هېوادوالو خدمت وکړي او په خبره یې د ټولنې د هر قشر لپاره او د هغوی د ژوند ښه کېدو په موخه په پلانونو کې برخې ځانګړې کوو.
نوموړي وویل، دوی وارخطا نه دي او له درنو مهاجرینو هم غواړي چې په الله توکل وکړي او خبلې خاورې ته راستانه شي.
سرپرست وزیر په خپلو خبرو کې زیاته کړه، چې تر پخوا یې چارې ګړندۍ کړي دي او په تېر یو کال کې یې شاوخوا (25) پلانونه جوړ کړي دي، چې دا چاره ډېره سخته ده، خو دوی په کمو امکاناتو ستر کار کړی دی.
ښاغلي نعماني وویل، لله الحمد نن د کندز ولایت په چهار درې ولسوالۍ کې د اجباري راستنېدونکو کډوالو لپاره د ښارګوټي پرانسته کوو، چې په درې زره (3000) جریبه ځمکه کې جوړېږي.
دی وایي، دغه ښارګوټي کې د ښار جوړولو ټول معیارونه په پام کې نیول شوي دي او ریزرف ساحه یې هم ورته په پام کې نیولې ده.
د کور او ښار جوړولو وزارت محترم سرپرست وزیر وویل، تر اوسه (۱۵۳۰۰) خلک ثبت شوي دي، چې (۳۷۴۱) نمرې په پام کې نیول شوي دي.
ښاغلي سرپرست وزیر وویل، موږ به د مهاجرو له ظرفیتونو ګټه پورته کړو او دوی دې هم دا فکر وکړي چې خپله خاوره یې ورته اړتیا لري.
نوموړي په هغه ځوانانو هم غږ وکړ چې د اقتصادي ګټو په موخه بهرنیو هېوادونو ته سخت سفرونه کوي، چې په خپل کور پاتې شي او په شته امکاناتتو دې شکر وباسي.
ښاغلي شیخ حمدالله نعماني د خپلو خبرو په دوام وویل، ځوانان دې د شیطاني وسوسو ښکار نه کېږي او په خپل هې،اد کې دې د کار کولو همت وکړي او انرژي دې دلته مصرف کړي.
د غونډې په پای کې د کندز چهاردرې ولسوالۍ کې د مهاجرینو ښارګوټي لپاره جوړ شوی پلان د کور او ښار جوړولو وزارت محترم سرپرست وزیر الحاج شیخ حمدالله نعماني له لوري رسماً په دغه ولایت کې د کور او ښار جوړولو محترم رئیس مولوي محمد رمضان کلیم ته وسپارل شو.
