کندز ولایت کې د یوې ټوټې ځمکې د برخلیک معلومولو په موخه کابل کې ناسته وشوه
۱۴۴۵/۱۰/۲۹
د کور او ښار جوړولو وزارت د محترم سرپرست وزیر شیخ حمدالله نعماني په مشرۍ ، د کورنیو چارو محترم وزارت، کرنې او مالدارۍ محترم وزارت، حج، ارشاد او اوقافو محترم وزارت، عدلیې محترم وزارت، پوهنې محترم وزارت او د سپین زر محترم شرکت استازو ګډه ناسته وکړه.
یاده ناسته، د ا.ا.ا د ریاسة الوزرا محترم عالي مقام د (۵۸۴) ګڼې لارښوونې د عملي کېدا په موخه ترسره شوه، چې څنګه کېدای شي په کندز ولایت کې د یوې ټوټې ځمکې د ملکیت برخلیک معلوم شي.
په ناسته کې، د هر لوري د نظریاتو او دلایلو له اورېدو وروسته، د کور او ښار جوړولو وزارت محترم سرپرست وزیر شیخ حمدالله نعماني، هر لوري ته وخت ورکړ چې د بلې ناستې لپاره دې د ځمکې اړوند اسناد او سوابق راوړي، په کمېټه کې به وڅېړل شي، برخلیک به یې معلوم او بشپړ راپور به د ریاسة الوزرا محترم عالي مقام ته وړاندې کړي.
