کابل ښار کې د صنعتي پارکونو د جوړولو لپاره د سپینې دولتي ځمکې د تثبیت په اړه سلا مشورې وشوې
۲۵/۰۶/۱۴۴۷
د کور او ښار جوړولو وزارت د ښاري چارو د محترم مرستیال شیخ مدار علي کریمي بامیاني په مشرۍ جوړې شوې کمیټې، کابل ښار کې د صنعتي پارکونو د جوړولو لپاره د صنعت او سوداګرۍ وزارت پورې اړوند د پلچرخي د ۷۰۰ جریبه صنعتي پارکونو د بدیل په توګه د سپینې دولتي ځمکې د تثبیت په اړه سلا مشورې وکړې.
یاده کمېټه چې د صنعت او سوداګرۍ وزارت، د کور او ښار جوړولو وزارت، د کرنې، مالدارۍ او اوبو لګولو وزارت د ځمکو د برخې او د کابل ښاروالۍ د استازو څخه جوړه ده، څه موده وړاندې یې د کابل ولایت په ښار او ولسوالیو کې ځینې سیمې تر ارزونې لاندې نیولې وې.
د کمېټې غړو وویل چې د ښار محدوده کې یې څو سیمې وڅېړلې، خو سپینه دولتي ځمکه د صنعتي پارک لپاره مناسبه ونه موندل شوه؛ له همدې امله د کابل ولایت په ولسوالیو کې د ښاري چوکاټ څخه بهر سیمې هم لا نورو هر اړخیزو څېړنو ته اړتیا لري.
د دې وزارت د ښاري چارو مرستیال ښاغلي شیخ مدارعلي کریمي بامیاني وویل چې د صنعتي پارکونو د جوړولو لپاره د مناسبې ځمکې تثبیت بنسټیز ارزښت لري، تر څو خلکو ته د کار زمینه برابره شي او اقتصادي وده رامنځته شي؛ نو ځکه باید لا زیاتې هڅې او پوره پاملرنه وشي، څو د کابل ښار لپاره د صنعتي پارکونو سپینه دولتي ځمکه په کره توګه وټاکل شي.
همدارنګه د صنعت او سوداګرۍ وزارت محترم استازي وویل چې په ډېرو هېوادونو کې د پانګونې لپاره پراخې اسانتیاوې ورکول کېږي، زموږ پانګه وال ملاتړ ته اړتیا لري، تر څو په هېواد کې د پانګونې لا ډېر فرصتونه برابر شي.
د کمېټې غړو د ارزول شوې سیمې او همدارنګه د ځینو نورو سیمو په اړه، د صنعتي پارک د جوړولو په موخه خپل نظرونه څرګند کړل.
په پای کې پرېکړه وشوه چې تر لا زیاتو څېړنو وروسته، د سیمې د ټاکلو په اړه اړینه پرېکړه وشي او د انتخاب لپاره د ریاستالوزراء اقتصادي کمېټې ته وړاندیز شي.
