کابل ولایت کې د صنعتي پارک د جوړولو لپاره د ساحې پر ټاکلو خبرې وشوې
۱۴۴۷/۵/۲۴
د کور او ښار جوړولو وزارت د ښاري چارو د محترم مرستیال شیخ مدارعلي کریمي بامیاني په مشرۍ، د کابل ولایت لپاره د صنعتي پارک د جوړولو کمېټې ناسته وکړه او د ساحې پر ټاکلو یې هر اړخیزې خبرې وکړې.
یاده کمېټه د کور او ښار جوړولو وزارت، د صنعت او سوداګرۍ وزارت، د کرنې، مالدارۍ او اوبو لګولو وزارت د ځمکو برخې، او د کابل ښاروالۍ د محترمو استازو څخه جوړه ده، څه وخت د مخه یې د کابل ښار او ولسوالیو بېلا بېلې ساحې ورکتلې وې، چې په تړاو یې خپل راپور په دې ناسته کې شریک کړ.
د کمیټې غړو وویل، د ښار په محدوده کې یې څو ساحې کتلي او ارزولي، خو د صنعتي پارک لپاره مناسبه ځمکه نه ده ورته ثابته شوې، اما په خبره یې له ښاره بېرون د کابل ولسوالۍ د صنعتي پارک د جوړولو لپاره غوره او مناسبې سیمې دي.
د کمېټې په باور، د دغو سیمو له جملې څخه د بتخاک ولسوالۍ اړوند د (لتهبند) ساحه او همدارنګه په ځینو نورو ولسوالیو کې هم مناسبې سیمې شته چې صنعتي پارک په کې جوړ شي.
د کور او ښار جوړولو وزارت د ښاري چارو محترم مرستیال شيخ مدارعلي کریمي بامیاني وویل، وخت یې دی چې باید د اقتصادي ودې او پراختیا لپاره بې درېغه هڅې وشي، ترڅو د صنعت کارانو او نورو عامو افغانانو لپاهر اسانتیاوې برابرې شي او په خبره یې ژر تر ژره دې مشخص ځای تعین شي.
د کمیټې غړو د ارزول شوو ساحو او همدارنګه د نورو احتمالي سیمو په اړه خپل نظرونه شریک کړل او د ناستې په پای کې تصمیم ونیول شو، چې له دقیقو او هراخیزو څېړنو وروسته به په راتلونکې ناسته کې د مشخص ځای په اړه پرېکړه وکړي او د ریاسة الوزرا محترم عالي مقام اقتصادي کمېسیون ته به یې وړاندې کړي.
