ښار جوړولو او ځمکو وزارت په لومړي ځل نږدې ۸۰۰ رغنيزې پروژې د انلاين معلوماتي بانک ته داخلې کړې

په هغه کنفرانس کې چې د حکومت د اطلاعاتو او رسنیو په مرکز کې جوړ شو د ښار جوړولو او ځمکو وزارت د ساختماني چارو معين محترم سید نسیم خلیق وویل چې د رغنيزو پروژو انلاين معلوماتي بانک د ښار جوړولو او ځمکو وزارت په چوکاټ کې فعال شوی دی چې په لومړي ځل يې ۷۹۷ ساختماني پروژې دې بانک ته داخلې کړي دي.

هغه زیاته کړه: حساب ورکونه، روڼتيا، معلوماتو ته د خلکو او دولتي ادارو د لاسرسي حق، په ولايتونو، ولسواليو او قريو کې د برنامو او ساختماني پروژو په اړه د خلکو د عامه پوهاوي د کچې لوړول، د ساختماني پروژو د تطبيق پړاونو په ډاګه کول او د برېښنايي حکومتولۍ دودول د دې بانک اساسي موخې دي.

په دې بانک کې د تېرو دريو کلونو ساختماني پروژو معلومات د سکتور، زون، ادارو، د ولايتونو او برنامو په اساس دسته بندي شوي او د لاسرسي وړ دي.

دا مهال په دې معلوماتي سيسټم کې ۷۹۷ ساختماني پروژې شاملې دي چې له دې ډلې ۶۵ پروژې د سروې ، ۱۲۹ پروژې د طرحې او ډيزاين، ۱۸۳ پروژې د تدارکاتو او ۲۶۰ پروژې د تطبيق په حال کې دي. همدارنګه ۷۲ نورې پروژې بشپړې او ګټې اخېستنې ته سپارل شوي دي.

په ورته وخت کې دې وزارت د تېرو دريو کلونو پر مهال په تعليمي او تحصيلي سکتور کې د ۴۷۷ پروژو، په روغتيا او ورزشي سکتور کې د ۱۰۰ پروژو، په ديني، مذهبي او تاريخي سکتور کې د ۱۵۱ پروژو، په ټولنيز او اداري سکتور کې د ۸۶ پروژو او په صنعتي او زراعتي سکتور کې د ۹ پروژو د پلي کېدو چارې پيل کړي دي.    

د ښار جوړولو او ځمکو وزارت په تشکيلاتي چوکاټ کې د افغانستان د ډيزاين مرکز رامنځته کول د دې وزارت يوه بله لاسته راوړنه ده چې د دې مرکز په جوړېدو سره به په لومړي ځل ټولې دولتي او عامه ودانۍ د پياوړو متخصصينو په وسيله ډيزاين او ورغول شي.

د ساختماني پروژو اطلاعاتي بانک له (http://gbcpl.gov.af/) لينک او همدارنګه د ښار جوړولو او ځمکو وزارت له ويب سايټ (www.mudl.gov.af) څخه ليدلی شئ.