په ۵ ولایتونو کې د کاسا زر پروژې د مالکیت حق تثبیت او ارزښت موندنې ۸۵ سلنه چارې بشپړې شوې
د ښار جوړولو او ځمکو وزارت یوازې په وروستیو دوو میاشتو کې وتوانېده چې په کابل، ننګرهار، لغمان، کاپیسا او پنجشیر ولایتونو کې د کاسا زر برښنا انتقالي پروژې د مالکیت حق تثبیت او ارزښت موندنې ۸۵ سلنه چارې بشپړې کړي او تمه ده ډېر ژر د دغې پروژې د ستنو نصب عملي چارې پیل شي.
په یادو پنځو ولایتونو کې ټولټال د برښنا ۹۵۳ ستنې تېریږي چې د ۷۴۹ هغو د مالکیت حق تثبیت او ارزښت موندنې بشپړېدو سره اوس د ستنو د نصب لپاره بشپړه زمینه برابره شوې ده.
د برښنا له دغو شمېر ستنو څخه ۵۷۴ دولتي او ۱۷۵ هغه شخصي تثبیت شوي او تمه ده چې په نږدې راتلونکي کې په یادو پنځو ولایتونو کې د پاتې ۲۰۴ نورو ستنو د مالکیت حق تثبیت او ارزښت موندنې چارې بشپړې شي.
د کاسا زر پروژې له لارې د قرغزستان او تاجکستان هېوادونو ۱۳۰۰ میګاواټه برښنا افغانستان له لارې پاکستان ته انتقالیږي او ترڅنګ به یې په کور دننه هم برښنا ته د اړتیا یوه برخه پوره شي.
د ښار جوړولو او ځمکو وزارت د مالکیت حق تثبیت او ارزښت موندنې چارو په ترسره کولو سره، د دغې سترې پروژې د تطبیق لپاره د زمینې برابرولو په برخه کې اساسي ونډه لوبوي.
