په نوي کابل ښار کې پر پانګونې خبرې وشوې
۱۴۴۵/۸/۲۵
د کور او ښار جوړولو محترم سرپرست وزیر شیخ حمدالله نعماني، په خپل کاري دفتر کې د د افغانستان لپاره د المان پارلمان د څار د پخواني سلاکار او د GIZ نړیوالې برخې پخوانی رئیس پروفیسور هنس دوبه سره د کورونو او اوبو رسولو برخه کې پر پانګونې خبرې وکړې.
راغلي پلاوي، د کور او ښار جوړولو وزارت له سرپرست وزیر شیخ حمدالله نعماني سره په ناسته کې وویل، لیوالتیا لري، چې د کابل په نوي ښار کې د هستوګنې کورونو او د اوبو رسولو په برخه کې پانګونه وکړي.
په ناسته کې د کور او ښار جوړولو محترم سرپرست وزیر، د المان هېواد پانګوالو ته په نوي کابل ښآر کې د پانګونې په اړه معلومات ورکړل او ډاډ یې ورکړ، چې د کور او ښار جوړولو وزارت ټولو کورنیو او بهرنیو پانګوالو ته د هېواد په ټولو ولایتونو کې د کورونو او ښارګوټو د جوړولو په برخه کې د پانګونې پوره اساتیاوې برابرې کړي دي.
د یادولو وړ ده، چې په دې وروستیو کې د ګڼو کورنیو پانګوالو تر څنګ بهرني پانګوال هم لیوالتیا لري چې په نوي کابل ښار کې د هستوګنې د کورونو په برخه کې پانګونه وکړي.
