په لغمان ولایت کې د ارشاد، حج او اوقافو اړوند جومات کانکریټ اچولو ته اجازه ورکړل شوه
۱۴۴۷/۰۳/۱۱
د لغمان ولایت د کور او ښار جوړولو ریاست محترم رئیس مولوي حسین احمد تیلوي وایي، چې د یاد ریاست تخنیکي او مسلکي ټیم د ګډ هیئت په شتون کې د ارشاد، حج او اوقافو اړوند هغه جومات له بهیره څخه لیدنه وکړه چې د ترانسپورت آمریت په انګړ کې د جوړېدو په حال کې دی.
ښاغلي مولوي تیلوي وویل، د ساحې د کتنې پر مهال د سپلونو او سیخ بندۍ تخنیکي معاینه ترسره شوه، چې له تایید وروسته د کانکریټو کارونو د پیل اجازه ورکړل شوه.
د نوموړي په خبره، همدارنګه د پروژې د شرکت مسؤل ته لارښوونه وشوه چې د پروژې د هرې برخې په پیل او پای کې دې د انجنیرانو د هدایت او څارنې پرته هېڅ ډول کار نه ترسره کوي.
د کور او ښار جوړولو وزارت مرکزي او ولایتي ټيمونه د پروژو په تطبیق کې د کیفیت، خوندیتوب او انجینري معیارونو پلي کېدو ته ځانګړې پاملرنه کوي.
