په فراه کې د لوړو زده کړو مؤسسې د احاطوي دېوال د ودانیزو چارو څارنه وشوه
۱۴۴۷/۰۸/۲۳
د فراه ولایت د لوړو زده کړو مؤسسې د احاطوي دېوال د اعمار چارو څخه د کور او ښار جوړولو وزارت د ښاري سرغړونو د مخنیوي د عمومي ریاست په لارښوونه څارنه ترسره شوه، یاده څارنه د دې لپاره ترسره شوه چې د پروژې بهیر د منظور شوو نقشو، تخنیکي معیارونو او ټاکل شوو اصولو سره سم پر مخ ولاړ شي.
د څارنې پر مهال څرګنده شوه چې د ودانیزو چارو بهیر په منظم ډول روان دی او ساختماني فعالیتونه د ټاکلي پلان مطابق پرمخ ځي. مسؤلو چارواکو له قراردادي شرکت څخه وغوښتل چې د پروژې د تطبیق پر مهال کیفیت، خوندیتوب او تخنیکي معیارونو ته جدي پاملرنه وکړي.
د لوړو زده کړو مؤسسې د احاطوي دېوال د اعمار پروژه د فراه ولایت د تعلیمي بنسټ د ساتنې او اداري نظم د پیاوړتیا په موخه پلې کېږي، چې له بشپړېدو سره به د یادې مؤسسې فزیکي خوندیتوب او تعلیمي چاپېریال لا ښه شي.
