په افغانستان کې د ځمکوالۍ سيسټم د مديريت پروژې د رهبرۍ کمېټې لومړۍ ناسته وشوه
په افغانستان کې د ځمکوالۍ سيسټم د مديريت پروژې د رهبرۍ کمېټې (ALASP) لومړۍ ناسته چې د محترم محمد جواد پیکار په مشرۍ ترسره شوه؛ پهکې د ماليې وزارت، اوبو او برېښنا وزارت، کرنې، اوبو لګولو او مالدارۍ وزارت، د چاپېريال ساتنې ملي ادارې، د مرکزي احصائيې ملي ادارې، د سيمهييزو ارګانونو ادارې، د کابل ښاروالۍ، د کابل پولي تخنيک پوهنتون او د سروې کوونکو ټولنې استازو برخه اخېستې وه.
په پيل کې د ښار جوړولو او ځمکو وزارت سرپرست په افغانستان کې د ځمکوالۍ نظام تاريخ په بشپړ ډول تشريح کړ او زياته يې کړه چې د افغانستان اسلامي جمهوري رياست عالي مقام د حکم له مخې به د ځمکوالۍ سيسټم د مديريت پروژې په تطبيق کې د همغږۍ پراخوالي په موخه د رهبرۍ کمېټې په ګډون ۹ حکومتي او اکاډميکې ادارې د ناستې برخه جوړوي.
محترم محمد جواد پيکار وويل دې وزارت په نړۍ کې د ځمکوالۍ نمونو (موډلونو) په مطالعې سره د جلالتماب جمهور رئيس په لارښوونه په افغانستان کې د ځمکوالۍ نظام د بنسټيزې پراختيا برنامه (IDPL) ترتيب کړه چې د ځمکوالۍ سيسټم د مديريت پروژه يې له اساسي برخو څخه ګڼل کيږي.
د ښار جوړولو او ځمکو وزارت سرپرست روښانه کړه چې دا پروژه د نړيوال بانک د ۳۵ ميليونه ډالرو او د ترکيې هېواد پراختيايي همکاريو ادارې(TIKA) او د نقشې او کدستر ادارې (TKGM) په تخنيکي مرسته په لومړي سر کې په کابل او هرات کې پلې کيږي.
تر دې وروسته د ښار جوړولو او ځمکو وزارت ارشد سلاکار (Sedat BAKICI) د ځمکوالۍ نظام د بنسټيزې پراختيا برنامې د بڼې، د تطبيق څرنګوالي، موخو او په پروژه کې د دخيلو ادارو د رول په اړه يو پرېزنټېشن وړاندې کړ.
نوموړي وويل، د دې برنامې له تطبيق سره به د معاصرې تکنالوژۍ څخه په استفادې په لومړي ځل د ملکيتونو او ځمکو د ثبت خدماتو له لارې د ځمکوالۍ نظام د عصري کېدو سربېره؛د املاکو د بشپړ خونديتوب، د دولت په ضمانت د قبالو صدور او د املاکو د ماليې اخېستلو او ورکولو بنسټ کېښودل شي.
له دې وروسته د ځمکوالۍ سيسټم د مديريت پروژې د رهبرۍ کمېټې غړيو د يادې پروژې په تطبيق کې د همکارۍ ډاډ او يو لړ وړانديزونه هم ورکړل.
ورپسې محترم محمد جواد پيکار يادونه وکړه چې د يادې برنامې د تطبيق لپاره يې د هوکړه ليک مسوده هم ترتيب کړې او تر لاسليک وروسته به يې عملي چارې پيل شي.
د ښار جوړولو او ځمکو وزارت په پای کې د رهبرۍ کمېټې د ناستو پر دوام د ټينګار تر څنګ وويل چې د ځمکوالۍ نظام د بنسټيزې پراختيا برنامې (IDPL) او د ځمکوالۍ سيسټم د مديريت پروژې په تطبيق سره به په افغانستان کې د ځمکوالۍ په برخه کې د تېرې يوې پېړۍ ستونزې حل شي.
