په ارزګان ولایت کې د ښاري سرغړونو څارنه ترسره شوه
۱۴۴۷/۷/۱
د کور او ښار جوړولو وزارت د ښاري سرغړونو د مخنیوي د عمومي ریاست په لارښوونه، د ارزګان ولایت د کور او ښار جوړولو ریاست تخنیکي ټیم د مرکز ترینکوټ اړوند د ټولو ناحیو ودانیو څارنه او ارزونه ترسره کړه.
د ارزګان ولایت د کور او ښار جوړولو ریاست محترم رئیس وویل، د څارنې پر مهال څرګنده شوه چې د دریمې ناحیې یوه استوګنیزه سیمه د تفصیلي پلان سره سم یوازې د استوګنې لپاره ټاکل شوې ده، خو یو کس غوښتل په دغه سیمه کې سوداګریزې هیټۍ جوړې کړي، د ښاري سرغړونو د عمومي مدیریت لخوا یاد شخص ته جدي لارښوونه وشوه چې ساحه یوازې د کور جوړولو لپاره وکاروي او د پیل شوي کار چارې یې باید ودرول شي.
همدارنګه، په دې څارنه کې نورو ښاریانو ته د ښار د پلانونو اړوند معلومات ورکړل شول، په ځانګړې توګه د استوګنیزو ، سوداګریزو او شنو سیمو حدود وښودل شول.
د کور او ښار جوړولو وزارت د طرزالعمل مطابق، ښاریانو ته لازمي لارښوونې او معلومات ورکړل شول تر څو د ښار په نظم والي کې ونډه واخلي او د پلانونو خلاف د جوړولو مخه ونیول شي.
